Shillong, Risaw 09 : U MP ba marwei ka Rajya Sabha na Jylla James Pangsang Kongkal Sangma ula kyrpad ia ka Joint Committee kaba shong bishar ia ka Foreign Contribution (Regulation) Amendment Bill, 2026 ba kan pynlong ia ka jingiasyllok bad ki kynhun bapher bapher ha Shillong.
U James, uba la shah thung kum u nongshah khot sngewbha sha ka Joint Committee, ula iathuh ba ula dep thoh sha u Chairman ka Committee Lok Sabha MP Dr Sanjay Jaiswal halor kane ka bynta.
“Nga la thoh dalade sha u Chairman ka Committee ba kan sngewtynnad bad pynsuk lada ka Committee ka dei ban wan sha Shillong bad iakynduh ia ki kynhun bapher bapher hangne, khnang ba ngin lah ban pynsuk ia ki kynhun ba kin wan bad iakynduh ia ki dkhot ka Committee” ong u James ha ka sngi Thohdieng.
Ula ong ruh ba ka Committee kala don ha ka iaid ha ka lynti kaba dei haba iadei bad ka jingaiti ia ka kaiphod hashuwa ban kut ka Dorbar Tlang jong ka Parliament.
“Ngi la iashong katto katne ki jingialang jong ka FCRA dang shen bad ngam lah satia ban batai ia kaei kaba la iakren ha kine ki jingialang, hynrei ka Committee kan iakynduh ia ki kynhun bapher bapher, kala iakynduh ia bun ki tnad bad nga tharai ka jingbthah ka long ba ngin pyndep ia baroh kiei kiei bad ban aiti ia ka hashuwaban kut ka Dorbar Tlang” ula ong.
“Ngi sngewthuh ia ka jinglong kyrkieh ka kam bad nga thikna bha ba hapoh ka jingialam u Dr Jaiswal, ngi dei ban lah ban pyndep ia ka kam bala bynshet” bynrap u James.
