Shillong, Risaw 09: Ka Confederation of Meghalaya Social Organizations (CoMSO) ka la kynnoh ba u Myntri Rangbah ka jylla Conrad K Sangma ula iada ia u Advocate General Amit Kumar bad pyrshang ban kiar na ka jingpynshai halor ka pisa paidbah ba la pynlut daka ophis u AG.
Ha ka kyrwoh u General Secretary ka CoMSO Balkarin Ch Marak u la ong ba ka sorkar kam shym la lah ban leh eiei ban jubab iaki jingkylli ba la buh da ki muktiar halor jingleh jong u AG.
“Ka jingleh jong u Myntri Rangbah ka long kaba pynduh jingkyrmen shibun. U ai jingkular ia ki muktiar hynrei u khlem burom pat iaki jingkular. Lada ka ktien jong u kam kit dor ei ei, kaei ka jingshaniah kaba sah ha ka sorkar jong u?” ong u Marak.
Ka seng ka la kynnoh ba ka sorkar ka buhrieh ia ki jingtip ba bniah halor ka jingpynlut pisa ka ophis AG.
“Haba la wad jingtip shaphang ki jingsiew bad ki jingpynlut haba iadei bad ki kam ain lyngba ka RTI bad ka sorkar ka kyntait ban ai ia ka jingshai, ka buh ia ka jingkylli kaba khia, kaei kaba ka sorkar ka pyrshang ban buhrieh, Balei ba la buh ia ki briew ha ka jingdum shaphang ka jingpynlut ia ki klur tyngka ka pisa paidbah” u la ong.
Ka CoMSO ka la buh jingkylli ruh balei ka sorkar ka bteng bad iatrei bad u briew nabar ka Jylla haba ki nongiasaid ain kiba tbit na ka Jylla ki don ha ka kam.
“Ka Meghalaya ka don ïa ki nongïasaid aiñ ba la kham rangbah, kiba tbit bad kiba la tbit bha kiba lah ban bat ïa ka kam jong u nongïasaid aiñ. Balei u Myntri Rangbah ka Jylla u paw ba u kham pyrkhat ban ïada ïa uwei u briew shimet ban ïa kaba ïada ïa ka jingshaniah jong ka sorkar jong u bad ka burom jong ka tnad aiñ jong ka jylla?” La kylli u Marak.
U la ong ba ka jingiai bteng iakhih ki muktiar ka la ktah ia ka jingtreikam jong ka iingbishar bad ka jingpynbiang ia ka hok ki paidbah.
“Ka jingïakynad ka la ktah ïa ka jingtreikam jong ki ïingbishar bad ki nongshong shnong kiba wad ïa ka hok ki mad jingeh namar ka jingshim sting jong ka sorkar. Ka jingkitkhlieh ka shong beit ha ka sorkar u Conrad Sangma, kaba la ïoh ïa ki lad baroh ban pynbeit hynrei ka la jied ban sngap jar,” ong u Marak.
“Ka Meghalaya kam dei ka shimet jong ka sorkar. Ia ki jaka treikam paidbah ym lah ban pyniaid katkum ka jingkwah shimet. Ka jingsngap jar kadei ka rai kaba la thmu ban iada ia u Amit Kumar ban ia kaba bat ia ka jingkitkhlieh,” u la bynrap.
