Nongpoh, Risaw 04 : Ka jingkyntur pud ka sorkar Assam da ka jingpynpoi jubor ia ki kam pynroi sha ki shnong khappud ka Meghalaya ka la nang iai bteng wat hapdeng ka jingiakren pynbeit pud bad kane kala paw na ka jingwan shna ia ka surok ha ka shnong Bakhlapara, kaba hap hapoh u pud u sam ka Hima Nongspung, Ri-Bhoi District.
Kane ka jingkyntur pud jong ka Assam da ka surok ha Bakhlapara kala paw pyrthei dang shen. La ioh jingtip ba ka Tnad PWD ka Assam, kala mang haduh T. 71.59 lak ban shna ia kane ka surok kaba pyniasoh na Patgaon sha Bakhlapara, kaba jngai kumba 1.203 kilometer bad ia kane ka surok la pyntrei da ka M/s Mahabahu Associate & Engineers.
Haba ioh jintip ia kane ka jingja, ki Kynhun Sengbhalang ka Thain ba kynthup ia ka KSU-Western Border, ka CoRP Sengkmie, u Suiem ka Hima Nongspung Patrick Syiemiong, kila hiar jurip ia kane ka surok hynne ka sngi Balang bad shem dala ki jong ki khmat ba ka jingpyntrei ia kane ka surok ka dang iaid shaid shaid.
Haba iakren bad ki nongthoh khubor, u Syiem ka Hima Nongspung Patrick Syiem, ula pyntip ba ka shnong Bakhlapara ka dei ka shnong jong ka Hima ka bym hap satia ha ka jingiakajia pud bad ka Assam. U ong ba kane ka jingshna surok ka Assam ka dei ka jingleh donbor bad ka jingkyntur ia u pud u sam.
U Syiem ula iathuh ba ula dep ban pyntip ia kane ka jingkyntur pud sha u CEM ka KHADC bad kumjuh ruh sha ki Pulit ka Patharkhmah Police Station bad Rani Outpost ba kin leit pynsangeh ia kane ka surok hynrei haduh mynta kam shym la don dak satia ban leh eiei na kine ki bor khmih.
U iathuh ba dei namar ka jingbym paw dak, ba mynta ka sngi ula wan jurip markhmat bad ki nongialam shnong ka Warmawsaw bad Umsohbar bala synran lang da ki kynhun Sengbhalang ban lap ia ka jingshisha.
“Ka Hima kan sa leit buh da ka jingujor pyrshah ia u Contractor ba pyntrei ia kane ka surok hapoh ka Ophis u Deputy Commissioner ka Ri-Bhoi, ba un shimkhia mardor ha kaban pynsangeh noh ia kane ka surok” ula ong.
Ha kajuh ka por, u Syiem ula pynpaw ruh ia ka jingsngewkhia halor ka jingleh kuman jong ka Sorkar Meghalaya ban leh tyngeh pyrshah ia ka jingkyntur pud ka Assam da kaba pynbiej ia u paidbah lyngba ki kam pynroi.
Na ka liang ki nongialam ka CoRP bad ka KSU ki la pynrem jur ia ka sorkar Assam kaba la nang iai kyntur pud bad dawa ia ka Sorkar Jylla ba ka dei ban tuklar mardor ia kane ka kam shuwa ba kan mih kano kano ka jingjia ka bym sngewtynnad.
