Shillong, Nailur 16 : U MLA ka AITC na Mawsynram Bah Himalaya Shangpliang hynne ka sngi Thohdieng, ula kyntu ia ka Sorkar Jylla ban mynjur ha kaban thungkam pura noh ia ka jingshakri jong ki palat 123 ngut ki peon casual kiba trei ha Secretariat mynta la bun bun snem.
Haba wanrah ia kane ka mat hapoh ka Iingdorbar, u Bah Himalaya ula ong ba kine ki peon casual ki dei kiba la thungkam naduh u snem 2013.
Une u MLA ula buh jingkylli ruh halor ka jingpynmih ia ka jingpynbna laitkam jong ka Secretariat ban thungkam haduh 77 ngut ki peon myn ha ka 9 tarik Rymphang.
U Bah Himalaya ula kyrpad ruh ia u Myntri Rangbah ka Jylla ba un khmih ia ka jingkyrpad bala phah sha u Chief Secertary myn ha ka 19 tarik Nailar ban shim rai ia kane ka kam.
U Myntri Rangbah u khlem ai satia ia kano kano ka jingkular bad ong ba u donkam ia ka notice halor kane ka kam.
