Guwahati, Naiwieng 21:U heh shipai u Lieutenant General Rana Pratap Kalita ula kyntu ia u nongialam ka kynhun kieng atiar United Liberation Front of Asom-Independent (ULFA-I) u Paresh Baruah na ka bynta ban wan sha ka miej jong ka jingiakren.
Haba kren ha ka prokram ‘Purvottar Swabhiman Utsav’ ba la khot pynlong da ka tnat shipai Indian Army ha Guwahati hynnin ka sngi, u Lt General Rana Pratap Kalita ula buh ka jingkyrpad ia u nongialam ka ULFA(I) hadien ba ula pynpaw ba ka jingbanbor jong kane ka kynhun kala nang hiar arsut ha Assam bad ba ka jingsuk kala ioh ban synshar pat hapoh ka thain.
Une u heh shipai ula ong ruh ba ka jingweng noh ia ka ain ba kyrpang jong ki shipai ne ka Armed Forces (Special Powers) Act na kiba bun ki district ka jylla lait noh na ki sawtylli ki jaka hapoh Assam bad ka thain North East ka pyni ia ka jinghiar arsut jong ki kam lehnoh ha kine ki shiphew snem kiba la dep.
“Ki samla ka jylla Assam bad ka thain North East kila jam shakhmat,” ong shuh shuh u Lt General Rana Kalita.
Lah ban kdew ba na ka liang ka tnat shipai Indian Army kala pynlong ia ka prokram ‘Purvottar Swabhiman Utsav’ kaba ar sngi hapoh ka jingkhmih jong ka HQ Eastern Command halor ka mat “Celebrating Contribution of India’s North East Region (NER) in Nation Building.”
Ia ka ‘Purvottar Swabhiman Utsav’ la rakhe da ka tnat shipai Indian Army’s Eastern Command shi bynta jong ka ‘Azadi Ka Amrit Mohotsav’ ban ithuh halor ka bynta jong ka thain North East ha kaba iadei bad ka jingtei ia ka ri.
Shi bynta jong kane ka prokram la pynlong ruh ia ka jingiamir jingmut hapoh Assam Administrative Staff College ha Guwahati hynnin ka sngi U Blei.Ha kane ka jingiamir jingmut la ia don lang ruh u Myntri Rangbah ka Meghalaya lem bad kiwei pat ki riew pawkhmat.
Ha kane ka prokram la ioh ruh ka jingkren na u Swapan Dasgupta uba dei u dkhot barim ka Rajya Sabha uba la pynpaw ba kumno ka jingkylla hapoh ki jylla ka thain North East kan kyntiew ia ka ri baroh kawei.
