Shillong, Nailar 19: U Chief Secretary ka Jylla Bah Donald P Wahlang ula kyntu ia ki Ophisar Meghalaya Civil Service (MCS) ba kin long kiba don ka mynsiem iarap bad sngewthuh ia ka jingeh ki paidbah haba ki wan iakynduh ban pan jingiarap.
U ne u Khiehduh ki Ophisar ka Jylla ula kren ia kane ha ka jingiakynduh lang ba shisien shisnem jong ka Meghalaya Civil Services Officers’ Association (MCSOA) 2022, kaba long hynne ka sngi thohdieng ha State Convention Centre, Shillong.
U Chief Secretary u la ban jur halor ka jingdonkam ban pyntbit shuh shuh ialade nangta ban ioh ki jinghikai la ka long na ka bynta kiba dang wan trei thymmai ne wat na ka bynta ki Ophisar kiba la rangbah khamtam ha kum kane ka juk Digital.
U la banjur ruh ba kum ki ophisar ki donkam ban sngewthuh ia ka jingeh ki nongshong shnong haba ki wan pynsngew ia ki ophisar ia ki jingeh ba ki kynduh.
U kyntu ruh ia ki ophisar ba haba ki kynduh kam bad ki paidbah ki dei ban pyni da ka jingieid, ka mynsiem iarap bad ban pyni ia ka jingsngewnguh namar ka kyrdan ba ki bat ka dei kaba lah ban weng ia ka jingeh ba ki paidbah ki kynduh.
Shuh shuh u ong ruh ba kum ki ophisar kim dei ban sheptieng hynrei ban jam shakhmat khlem ailad ia ki jingsngew bad ban shim ruh ia ki rai kiba dei na ka bynta ka jingmyntoi ki paidbah.
Kawei ka bynta kaba u Chief Secretary u ban jur ka long ia ki ophisar ba dang thymmai ba kin nang kumno ban kunai khnang ba kin lah ban ioh ia ka lawei kaba biang ynda ki la shongthait. U kyntu ruh ia ki ban pynmlien ia ka rukom im ban sumar ia ka met bad ka jingkoit jingkhiah lajong.
Kiwei pat kiba kren ha kane ka sngi ki kynthup Ia u Dr Vijay Kumar, Commissioner of Division na bynta ka Garo Hills, u Bah C V D Diengdoh, Secretary Personnel bad AR Department. Ha kane ka jingkynduh lang la wan ban shim bynta da bun bha ki ophisar MCS na kylleng ki bynta jong ka jylla.
