Tura, Nailur 01 : “Ka jingpyndon burom ba shisha ia u (L) Purno A Sangma kan long da kaba bud ia ka dienjat bad ia ki nongrim ba u ieng, ban buh beit ia ka Ri bad ki paidbah hakhmat eh” ong u Myntri Rangbah ka Jylla Conrad K Sangma haba kyntu ia ki paidbah ban bud ia ki dienjam jong u Kpa, uba dei lehse u Nongialam ba radbah naka thain Shatei Lam Mihngi ka Ri haduh mynta mynne.
Haba kren ha ka 7th PA Sangma Memorial Lecture bala pynlong da ka NEHU, Tura Campus bad ka PA Sangma Foundation hapoh ka District Auditorium, Tura ban kynmaw ia une u Nongialam Garo ha ka lyngkhuh sngikha ba 76 snem, kaba la wan iashimbynta ruh da u Nongthoh khubor ba pawnam bad Editor-in-Chief ka Print, Shekhar Gupta kum u Nongkren ba kyrpang, u Conrad ula pynkynmaw ia ki Nongrim bad ka jinglong jong u Kpa ha ka jingshakri ia ki paidbah.
“ U (L) PA Sangma u dei u Nonghikai bad u Nongialam ba shisha uba la hikai hok ia ngi bad btin lynti ia ngi (ki khun) ba kin pynthikna ba kaei kaba ki leh ha ka jingim, khamtam ha ka sain hima simar, ba ki dei ban buh shuwa ia ki paidbah hakhmat eh bad pynthikna ruh ba kano kano ka rai ba ki shim ka dei ban long ia kaei kaba bha tam na ka bynta u paidbah bad kane ka Ri” ula ong.
Ula ban jur ba u PA Sangma u dei u briew uba kham palat ia kaei kaba lah ban iohi, bad kaei kaba ki briew ki pule halor jong u bad kaei kaba u leh. U ju kren halor ka akor ka burom bad ki nongrim sha ki bad kine kin iai im shirta.
“Ngi khmih ia ki maw nongrim, ngi khmih ia kane ka auditorium bala shna da u ha u snem 1988, bad ngi kynmaw, hooid u PA Sangma ula shna ia kane. Kine ki dei tang ki jingtei bad tang katto katne kiba ula tei. Hynrei ka dei ka jinghikai ia ka akor, ka brom bad ka nongrim ia ngi ka ban iai bteng ban im wat ula khlad noh lane ynda ngi la khlad noh” ong u Conrad.
U Nongthoh khubor ba pawnam Shekhar Gupta ula pynpaw ba u PA Sangma ula leit noh dang kloi palat bad ki dang don shibun kiei kiei kiba dei ban leh na ka bynta ki paid riewlum ka Ri India. Ula pynkynmaw ruh ia ka por ong u ha ka thain Shatei Lam Mihngi kum u Nongthoh khubor ba dang khynnah jong kawei ka kot khubor National ha u snem 1980, bad iathuh ba ula shang kylleng ki jaka jong ka thain hynrei niar eh ban shang ha Meghalaya khamtam sha Ri-lum Garo watla u dei uba treikam na Shillong.
Ula kdew ba wat ka Ri India ka don haduh 8 % ki paid riewlum, kaba kot haduh 10-11 klur bad kaba mut ruh baka India ka don bun eh ki paid riewlum ha ka pyrthei, hynrei ym shym la don uwei ruh u Nongialam rewlum uban iohi mynta hapoh ka Pan-ndia lane ha ka Ri India ban mihkhmat ia ka sur jong kine ki jaidbynriew kiba la saphriang ha kylleng ki jaka jong ka Ri. Kane ka dei ka kam ba sah thylli naduh ba khlad noh u PA Sangma uba la mihkhmat ia baroh ki paid riewlum ka Ri India.
Pule lang ia kane: Ialam u DyCM ban ai snam ha ka prokram synniang snam ka NPP
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
