Shillong, Rymphang 20 : U Chairman ka Meghalaya State Food Commission Bah D.P Wahlang ha ka sngi Thohdieng, u la ban jur halor ka jingdonkam ban pynneh ïa ka jingbha bad jingbun jong u khaw ba la sam lyngba ki Fair Price Shop bad kyntu ruh ïa ki nongïoh jingmyntoi ba ki dei ban pyntip ïa kino kino ki jingeh ba ki iakynduh.
Haba kren ha Regional Camp ban pynkhlaiñ ïa ka jingpyntreikam ïa ka National Food Security Act (NFSA) ha Meghalaya, u Bah Wahlang u la ong, “Ngi don hangne ban pynthikna ba ym dei ban don mano mano ruh kiba dei hok ba kin shah kyntait ban ioh ia ki marbam.”
Ka Commission ka trei ban peit ia ka jingpyntreikam ia ki skhim Food Security lyngba ki Tnad bapher bapher kynthup ka Food & Civil Supplies, Education bad Social Welfare.
Hapoh ka rukom sam rashon, ki Longiing Antyodaya Anna Yojana (AAY) ki ioh 35 kilo u khaw man u bnai katba ki Priority Household ki ioh 5 kilo khlem kano kano ka jingsiew.
Ka camp ka iakren ruh halor ka jingkongsan ki jingbam tei met ba ju sam lyngba ki Anganwadi Centre bad ka jingpynshlur ban don ia ki kper thung jhur thung jhep ha Iing.
Ki Ophisar kila ai jingbatai halor ka jingpyntreikam ia ka NFSA, kynthup ka jingbud ryntih ia ka E-KYC, ka jingsam ration card bad kiwei kiwei.
Ia kane ka camp la pynkut da ka jingpyni ia ka kolshor bad ka jingsam khusnam sha u nongsam marbam jong ki Fair Price Shop ba treikam bha.
Ka Meghalaya State Food Commission kala pynpaw ba ka kut jingmut hok ban pynthikna ba ym dei ban don ki nongshongshnong kiba dei hok ban ioh marbam ba kin shah pynduh.
