Shillong, Risaw 23: U Nongialam ka Liang Pyrshah ha Khasi Hills Autonomous District Council (KHADC) u Bah Titosstarwell Chyne u la kyrpad ia ka Executive Committee (EC) ba ialam daka Voice of the People Party (VPP) ba kan sangeh noh ban kynthoh shimet hynrei kadei ban trei ha ka ban pynbha ia ka rukom treikam ka District Council.
Haba kyrshan ïa ka Motion halor ka mat jong ka Non-Tribal Employee Clearance Certificate (NTECC), u Bah Titos ula kren halor ka jingkhynra ba la pynlong da ka KSU ha ka jaka jngohkai pyrthei ha Sohra’s Jiva resort ha kaba la lap ïa ki slip ba rong lieh bad rong pink ba la ai sha ki nongtrei bar Jylla.
U Bah Titos u la pynpaw ia ka jingsngewsih ba uwei na ki Executive Member (EM) ka KHADC u la buh ia ka WhatsApp Status daka jingthmu ban kynthoh shimet pyrshah ia u.
U EM u la buh jingkylli balei ki Sengbhalang jong ka Sohra ki sngap jar haba u CEM uba dei u MDC ka Sohra, u la ai labour license ha u snem 2021.
U Bah Titos u la pynshai ba um kwah ban kren halor katei ka mat mynshwa, hynrei mynta um lah shuh ban shu sngap jar.
“U EM, ha ka jinglong jong u ha ka social media, u la pynpaw, “Shani ki nongialam sengbhalang jong ka Sohra haka por ba u CEM uba dei u MDC jong ka Sohra, u la ai ia kane ka labour license ha u snem 2021? Balei ngi dei ban shim ia kiei kiei kum ki jingkynthoh shimet? Balei ngi pynlong ia kiei kiei kum ki jinglong shimet? Kaei ka jingdonkti jong nga ha ka jingkhynra ba la pynlong da ki sengbhalang, Phi sngew ba ka long kaba dei ban kynnoh ia nga ba nga la phah ia ki? wad ba kaei kaba ki EC ba mynshuwa ki leh, lada ka long kaba bakla, ka dei ka kamram jong phi ban pynbeit ryntih ha ka jaka ban shu kynthoh shimet” la ong u Nongialam Liangpyrshah.
U Bah Titos ula pynshai ba ka KHADC kam don bor shuh ban ai labour license hadien ba ka Sorkar Jylla ka la pyntreikam ia ka ain jong ka Jylla kaba iadei bad ki nongbylla bad Jylla.
U la pynshai ba ka Executive Committee (EC) kaba mynshwa ka la ai ia ki non-tribal clearance certificate sha ki nongbylla bar Jylla namar ba ki briew ki shaniah ha ka District Council ban tehlakam ia ka jingwan tuid jong ki nongbylla bar Jylla sha kane ka thain. Hynrei u la kubur ba ki don ki jingduna ha ka rukom treikam.
U Bah Titos u la ban jur ba ka kamram jong ka EC kaba thymmai ka long ban pynbha ia kiei kiei, ym ban kynnoh bad kynthoh iwei ia iwei pat.
“Haba ngi don ha ka bor, ngi leh ia kiei kiei da ka jingtip. Ngi sngewthuh ruh ba ka kyrdan jong ngi ka long kaba shipor, bad kata ka por kan sa poi ba ngin hap ban plie lad ia kiwei pat, bad lada ki lap ia kaei kaei kaba ym dei, ki dei ban sangeh noh ia ka. Kam dei ba tang namar ba kiwei ki leh ia kaei kaei, nga ruh ngan leh kumjuh. Lada phi tip ba ka long kaba bakla, nga khmih lynti ba kito kiba wan hadien kin pynbeit ia ka” ula ong.
U Nongialam Liangpyrshah u la kyntu ia ka District Council ba kan leh ia kaba dei ha kaba iadei bad ka kam labour license khnang ba kan nym buh ia ka Council ha ka jingshah kynthoh.
Ha ka jubab iaka jingkren u Nongialam ka Liangpyrshah u CEM u Bah Winston Tony Lyngdoh u la pynpaw ba um shym la kynnoh eiei pyrshah ia u hynrei u la shu pynpaw ba la pynmih ia ka NTECC ha ka por ba u long CEM.
U la pynshai ba ka jingkren jong u kam dei ban pynjah burom ia u Nongialam ka Liangpyrshah hynrei ban ai ia ki jingshisha bad ban pynshai ba ka NTECC ka la sdang ha ka por ba u dang bat iaka shuki CEM.
 u Bah Titosstarwell Chyne u la kyrpad ia ka Executive Committee (EC) ba ialam daka Voice of the People Party (VPP) ba kan sangeh noh ban kynthoh shimet hynrei kadei ban trei ha ka ban pynbha ia ka rukom treikam ka District Council.){kind=link}