Shillong, Naiwieng 21: U nongmareh marathon ba pawnam ka Meghalaya, Bah Binningstar Lyngkhoi u la iawer ïa ki samla ka ri India ban ïashim bynta ha ka Viksit Bharat Challenge ka ban long hashuwa ka National Youth Festival 2025.
Da ka khubor ban ai mynsiem iaki samla, u Bah Binning u la pynshlur ïa ki samla India ban shim ïa kane ka jingiakop kum ka lad ban kiew, ban ïoh jinghikai, bad ban thaw dur ïa ka lawei jong ka ri.
U Myntri ka tnat Sport ka Sorkar Pdeng Dr Mansukh Mandaviya u la pynbna ba ka ‘Viksit Bharat Young Leaders Dialogue’ kan long ha ka National Youth Festival ha ka 11 bad 12 tarik Kyllalyngkot 2025. Ha kane ka lympung kaba ar sngi, u Myntri Rangbahduh ka ri India u Narendra Modi un ïakren bad ki 3000 ngut ki samla ha ka Bharat Mandapam ha ka nongbah Delhi.
“Kum u nongïalehkai, nga la ïoh jinghikai ba man la ka jingeh ka dei ka lad ban kiew. Ka Viksit Bharat Young Leaders Dialogue ka ai ïa phi ïa ka rynsan ban pyni ïa ka jingtbit jong phi, ban pynjanai ïa ka jingmut jingpyrkhat jong phi, bad ban pynïasoh bad ki jingmut jingpyrkhat kiba shai na kylleng ka Ri. Ka Vikasit Bharat Challenge – ka dei ka kabu jong phi ban tyngshain bad ai mynsiem ia ka lawei. Shaniah ha lade bad trei shitom naka bynta kaba bha tam jong phi” la ong u Bah Binning.
Ka Round 1 jong ka Viksit Bharat Challenge ka don ïa ka jingïakob kylli jingkylli digital ha baroh kawei ka ri India, kaba la buh por hapdeng ka 25 tarik u Naiwieng haduh ka 5 tarik Nohprah 2024. Ki briew kiba hapdeng ka rta kaba 15 haduh 29 snem kin ïoh ban ïashim bynta ha kane ka jingkylli kaba la pynlong ha ka Mera Yuva Bharat. Kane kan tynjuh ïa ka jingtip bad jingsngewthuh jong ki nongïashim bynta shaphang ki jingjop ba kongsan jong ka India.
Ki nongjop ha ka jingïakob quiz hadien kata kin ïaid lyngba sa lai sien ha ka dur jong ka jingïakob thoh essay/blog, ka jingpyni ïa ka ‘Viksit Bharat Vision’ ha ka kyrdan jong ka Jylla bad kaba khatduh, ka National Championship ha kaba ki nongjop ha ka kyrdan jong ka Jylla kin ïashim bynta ha ka Bharat Mandapam.
Shwa ia kane, ka Dr Mansukh Mandaviya haba batai ia ki jingthmu ba kongsan jong ka ‘Viksit Bharat Young Leaders Dialogue’, ka la ong, “Ka tamasa ka thmu ban ithuh bad ban pynheh pynsan ia ki samla kiba don sap, ban ai lad ia ki ban iasam ia ki jingmut jong ki na ka bynta ka Viksit Bharat. Ka jingïakynduh kaba kongsan na ka bynta ki samla kan long ka lad ban ïakynduh beit bad u Myntri Rangbahduh bad ban pynpaw ïa ki jingmut jong ki na ka bynta ka lawei jong ka India, da kaba kyntiew ïa ka jingïashim bynta jong ki samla ha ka saiñ hima sima bad ka jingim nongshong shnong.”
U Dr Mandaviya u la buh thong ban pynrung ïa ym duna ïa ka 1 klur ngut ki samla (15-29 snem ka rta) na kylleng ka ri India ban ïashim bynta ha kane ka Viksit Bharat Challenge, ka ban long kum ka sien sdang sha ka jingïakhun ba kongsan ha Bharat Mandapam.
Ka jingïakren jong ki nongïalam samla jong ka Viksit Bharat–ka tamasa ki samla ka Ri 2025 kan khot ïa ka jingïalang kaba shlur jong ki samla ba la jied na ki lai tylli ki bynta bapher bapher.
Ka kynhun kaba nyngkong ka kynthup ïa ki nongïashim bynta na ka Viksit Bharat Challenge kaba dang shu pynbna thymmai bad ka kynhun kaba ar kan kynthup ïa ki samla kiba don sap kiba mih na ki tamasa samla ha ka kyrdan jong ki distrik bad ki jylla, ha kaba kin ïakhun ha ki kyrdan bapher bapher kum ka jingdro dur, ki jingpyni science, ki jingpyni kolshor, ki jingïakop pynpaw pyrthei, ka kam seng kam seng jam, ka jingialehkai, ka rep ka riang, bad ka teknoloji, bad kiwei kiwei.
