Guwahati, Nailar 23: Laitylli ki kynhun seng jong ki riewlum kila kyntu ia u Myntri ka sorkar pdeng, u Amit Shah ba un pynkhreh da ki ‘Helpline Number’ ba kyrpang na ka bynta ki briew kiba dei na ka thain shatei lammihngi (Northeast) jong ka ri hapoh Noida khnang ban iada na ka jingshah banbein bad ka jingshah thombor jong ki briew kiba dei na kane ka thain kiba shong ba sah ha kane ka sorbah ka thain shatei jong ka ri.
Ka Chakma Welfare and Cultural Society, Noida, ka Arunachal Pradesh Chakma Students Union bad ka Arunachal Pradesh Chakma and Hajong Students Association ha ka memorandum ka jong ki sha utei u myntri ka sorkar pdeng, ki la ong ba ki nongshong shnong kiba dei na ka jaidbynriew Chakma tang hapoh Noida ki don kumba 1000 ngut, bad kila ngat khah khah ha ka jingshah banbein bad shah thombor.
Kine ki lai seng kila ong ruh ba ka jingdon jong ki nongshong shnong ka thain northeast kiba trei ba ktah hapoh Noida kaba dei kawei na ki thain kaba hap hapoh ka National Capital Region (NCR) kam pat shym la don satia ia kiba kum kine ki ‘helpline number’ na ka bynta ki briew kiba dei na kane ka thain northeast.
Kine ki seng kila kam ba ha ka 13 tarik mynta u bnai, arngut ki briew na ka thain Northeast, kata u Gyana Ranjan Chakma bad u Nivaran Chakma kiba trei ba ktah ha Salarpur, Bhangel hapoh Noida kila shah thombor tyngeh da ki nar bad ki mawit hala ki jong ki trai kiba ai kam bad kiwei pat kat haduh ba kin da mynsaw jur.
Kine ki arngut kila leit da lade hi shapoh ka hospital, hynrei kila shah kyntu ban leit shapoh police station hashwa ba kin ioh ia ka jingsumar.Kumta ruh kine ki arngut kila leit mih shapoh police station ban ujor FIR, hynrei namar ba ki dei na ka thain northeast, na ka liang ki bor pulit ka Noida kim shym la shim khia bad iai pynap sah ia ki wat hapdeng ka jingdonkam kyrkieh ia ka jingsumar.
Ha kaba khatduh, la rejistar ia ka FIR hynrei kam pat shym la don kano kano ka jingpynshitom kat haduh mynta.Kine ki briew kiba la shah kynnoh donkti kila iaid laitluid khlem da shah kem,” ong u Santosh Baburah Chakma President jong ka CWCSN.
Katei ka memorandum kala ong ruh ba ki briew na ka thain northeast ki iapher shibun bad ba kim ioh ia ka jingpdiang sngewbha na ki nongshong shnong kiba dei ki trai shnong jong ka thain.Ki briew na kane ka thain kim don ia ka jingsngew shngain bad ki ju ngat khah khah ha ki jingshah banbein bad shah thombor namar ka jingiapher ha jinglong ha ka dur ka dar, ong ka memorandum.
Shuh shuh katkum ka memorandum, kine ki kam banbein ki kynthup ruh halor ka jingpynmih ia ki kyntien kynthoh, pyndom, lehbor, ban leh ia ki kam jrongkti bad ki kam thombor.Nalor kata la ong ruh ba ki briew na kane ka thain kila ngat ruh ha kiwei pat ki rukom shah thombor, kata ka jingbym siew ia ki bainong ha ki jaka kiba ki trei, bad ha kiba bun ki khep kim ju leit ban ujor namar ka jinglong ba mutlop jong ki pulit.
