Guwahati, Naitung 26 : Ka tnat transport ka Assam ka la kyntu ia baroh ki ba pyniaid ia ki bus skul ha Guwahati ba kin pyndait ia ki CCTV camera hapoh ki kali.
Katei ka tnat pyniaid kali ka Assam ka la pynmih ia kane ka hukum na ka bynta ki bor pyniaid skul, kata kynthup ia ki skul shimet bad ki skul sorkar hynnin ka sngi Nyngkong ka ba long ruh katkum ki kyndon ba la pynmih da ka iingbishar Supreme Court.
U Gautam Das, assistant transport commissioner, Kamrup (Metro), u la ong ba kito ki ba pynkhein ia kane ka hukum ba la pynmih da ka tnat transport kin ngat ha ka kuna ka ba T. 10,000.
“Ki la don ki katto katne ki kyndon ba la pynmih da ka iingbishar Supreme Court bad ruh halor ka hukum na ka National Commission for Protection for Child Rights ka ba thmu na ka bynta ka jingshngain jong ki khynnah skul ha ba ki don hapoh ki bus skul. Ki bor pyniaid skul ki dei ban bud ryntih ia kane,” ong u Das.
Nalor kata u la ong ruh ba nalor ki bus skul, kino kino kiwei pat ki kali ba la pyndonkam na ka bynta ban kit ia ki khynnah skul kin kynthup lang ha kane ka hukum ba la pynmih da ka tnat transport.
Ki bus skul lane ki van ki dei ruh ban ai da ka rong stem ha ryngkat ka kyntien “school bus” nakhmat bad nadien jong ki kali. Lada ka dei ka bus ka ba shu wai, dei ban thoh, “On School Duty.”
Nalor kata u la ong ruh ba kine ki kali ki dei ban don ia ki first-aid box bad ka jingpynlip ding.
“Ia ka kyrteng jong ka skul bad ki telephone nombor dei ban thoh hapoh kine ki bus. Ia ki jingkhang jong ki kali dei ban pyndait skhem bha. Ka jaka shong ka dei ban long kham kylluid na ka bynta ban ioh buh ia ki pla skul,” ong shuh shuh u heh ka tnat transport.
