Guwahati, Naitung 06 : Ka Assam Trinamool Congress (TMC) ka la kyntu ia ka jingtuklar jong u Lat ka jylla, u Jagdish Mukhi khnang ban pynthikna ha ka ba iadei bad ka jingpynkloi ia ki lad jingiarap sha ki lanot shlei um ha ka jylla.
Lah ban kdew ba haduh kumba 1 klur ki nongshong shnong ki la shah ktah jur na ka jingshlei um ha Assam ka ba la sdang naduh u bnai Iaiong ba la dep.
Na ka liang ka TMC ka Assam ka la aiti ruh ia ka memorandum sha u Lat ka Assam u Jagdish Mukhi ba un tuklar lem ha ka ba iadei bad kane ka phang.
U president ka TMC ha Assam u Ripun Bora u la ong ba ka sorkar jylla ka dei ban pynthikna ban pynbiang ia ki lad jingiarap sha kito ki briew ki ba la shah ktah jur.
Nalor kata u la ai jingmut ruh ia ka sorkar jylla ba ka dei ban pyllait ia ka jingiarap pisa ka ba mar T.5 lak sha ki ba haiing hasem jong kito ki lanot ki ba la khlad noh na ka jingshlei um.
“Ki ba bun na kito ki ba khlad ha kane ka jingshlei um ki dei ki nongri nongbsa ia ka iing ka sem. Da ka ba pynshong nongrim halor kane ka bynta, ngi dawa ba iwei iwei na ki dkhot ka longiing jong ki ba iap dei ban pynrung ha kino kino ki kam sorkar,” ong shuh shuh une u heh ka TMC u Ripun Bora.
Shuh shuh u la ong ruh, “Da kaba pynshong nongrim halor ka jingshah pynjulor ba shyrkhei ha Barak Valley, khamtam ha Cachar district, dei ban aijingiarap kyrpang na ka bynta ka Barak Valley.”
