Shillong, Naitung 06: Ki Nongialam ka seng Tour Guide Association of Meghalaya (TGAM) hynne ka sngi kila iakynduh ia u Chief Executive Member (CEM) ka Khasi Hills Autonomous District Council (KHADC) bad kyntu iaka district council ba kan pyrrkhing iaka jingtreikam ki Tour Guide Operator kiba nabar jylla ban treikam hapoh u pud u sam jong ka Council.
Haba kren sha ki lad pathai khubor u President ka TGAM bah Ialamphang Lyngdoh ula ong ba kane ka jingwan kynduh ia u CEM ka KHADC ka dei ban iakren halor ka jingsdang jyllei ki Tour Operator nabar jylla ban treikam hapoh u pud u sam ka Council khlem da kynjoh ktien shaki Tour Operator trai ri trai muluk.
U bah Ialamphang ula ong ba ka seng kala shem ba kane ka jingjyllei bad ka jingtreikam ki Tour Operator nabar jylla ka ktah bha iaki samla trai ri trai muluk ban sengkam lajong khamtam haba iadei bad ka jingkyntiew iaka kam jngohkai pyrthei.
Ula ong ba ka jingkyntu iaka KHADC ba kan peitngor iaka jingtreikam ki Tour Operator nabar jylla ka dei hi ban kyntiew ia la ki jong ki samla kiba seng ia kum kine ki kam namar ka jingtreikam kine ki Company na bar jylla kan ktah iaka kamai kajih ki khun samla trai ri trai muluk.
“Ym dei tang ba kine ki Tour Operator nabar jyllla ki ktah iaka kamai ka jih ki samla trai ri trai muluk hynrei kaba kham kongsan ka long ba kine ki Company ba na bar haba ki wanrah iaki nongwan shangkai suwari sha Meghalaya, ki ai ka jingpyntip bakla halor ki jaka bad ka poi ruh shaka jingpynjot iaki jaka jngohkai pyrthei kiba don ha Meghalaya” la ong u bah Ialamphang.
U bah Ialamphang ula kam ruh ba ki nongpyniaid iaki Tour Operator nabar jylla kum na Assam, kim da tip bha iaka jinglong jingman ki jaka jngohkai pyrthei ha Meghalaya bad kane ka lah ban buh ruh ha ka jingma ia ka jingim jong ki nongwan shangkai suwari lada ialam sha ki jaka shangkai kiba don jingma.
“Ki nongwan shangkai suwari ki kynthup lang iaki ba wan wad bniah, ki Researcher lane ki samla pule kiba kwah ban tip kham bniah iaka jinglong jingman ki jaka hynrei namar ba ki wan bad ki Tour Guide ba nabar jylla, kine ki Tour Guide ruh ki poi shaka jingialam bakla iaki namar kim tip bniah iaka jinglong jingman ka jaka” ula ong.
Pule ruh: Pynbna ka KHADC ia ka Scholarship ban wad bniah halor ka Jaidbynriew
 hynne ka sngi kila iakynduh ia u Chief Executive Member (CEM) ka Khasi Hills Autonomous District Council (KHADC) bad kyntu iaka district council ba kan pyrrkhing iaka jingtreikam ki Tour Guide Operator kiba nabar jylla ban treikam hapoh u pud u sam jong ka Council.){kind=link}