Shillong, K’lyngkot 05: Hadien ba ka seng Hynniewtrep National Liberation Council (HNLC) weng noh ialade na ka jingiakren iasuk, ka Sorkar Jylla kala kyntu ia ka Seng ba kan pyrkhat biang bad ban weng noh ialade na ka jingiakren ba lai liang mamla kaba dang iaid.
U Nongaiktien bad Myntri Sorkar Bah Paul Lyngdoh, ula pyntip ba watla kam pat don satia kano kano ka jingaiktien ne ai jingthoh, ka Sorkar kala shimkhia bha ban pynbeit ia kane ka kam.
“Ngi dang iohi tang ha ki kot khubor ia ka khubor, hynrei ngim pat ioh ktien ne jingthoh. Nyngkong eh, nga kwah ban kyntu ia ka HNLC ba kan nym weng noh ialade na ka jingiakren iasuk namar shibun kiei kiei lah dep ban iakren bad kyrmen ba baroh ki liang mamla kin sa hun lang” ula ong.
U Bah Paul ula kren halor ka jinglong kyrkieh ka kam bad pyntip ba kan sa don ka jingialang ba kyrkieh hadien ba la wanphai u Myntri Rangbah ka Jylla Conrad K Sangma bad Symbud Myntri Rangbah Bah Prestone Tynsong sha Shillong.
Haba pynpaw ia ka jingkut jingmut ban pynbeit ia kiei kiei baroh, u Bah Paul ula kular ba ka jingdawa jong ka HNLC ban map noh ia ki kam bymman baroh, ka dei kaba la shong bishar da ka Sorkar bad ka lah ban ioh ia ka jingmynjur.
