Nongstoiñ, Nailur 29: Ka jingpyntrei їa ka surok two lane Nongstoiñ Kyrshai ha ka wat kaba nyngkong kaba ha ka jingjngai kaba 32 kilometer, ka la їaid shait shait bad la khmih lynti ba hapoh une u snem yn lah ban pyndep kumba la thmu.
Watla ka jingpyntrei їa katei ka surok ka la їaid shait shait, hynrei ki dang don ki jaka kiba ka kompeni kaba pyntrei ka la hap ban sangeh suwa. Namar ba ki don ki post elektrik kiba pynwit bad hap ban pynkynriah namar ki don ha ki jaka pdeng ba ka surok ka dei ban їaid.
U bah Kharlesborn Nongbri President ka National Hynñiewtrep People West Khasi Hills, haba їa kren bad u nongthoh khubor, u la ong ba na ka liang jong ka seng bad ki paitbah ka thaiñ ki da angnud bad kwah eh їa ka Kompeni kaba pyntrei їa katei ka surok ba kan pynsted bad pynkloi khnang ba ki paitbah kin kham lait noh na ki jingeh ha ka leit ka wan ka kit ka bah bad ka kamai kajih.
Utei u nongїalam ula pyntip ba ka seng kala leit ban їakynduh bad ki nongpynїaid jong katei ka Kompeni kaba pyntrei їa katei ka surok, ban kyrpad їa ki, ba kin їaleh ban pynsted їa ka jingtrei bad ban pynbeit bad ka Meghalaya Energy Corporation Limited, ba kan pynkynriah noh kham kloi їa kitei ki eletrict polls.
Ki nongpynїaid ka kompeni kila pyntip ba ki la dep ban їakren bad їa pynbeit bad ka MeECL bad ka ba sah mynta ka dei satang ha ka MeECL ban leh ia ka kam.
