Shillong, Naiwieng 01: Ka Myntri ka tnat ka koit ka khiah ka Kong Ampareen Lyngdoh hynne ka sngi kala kyntu iaki nongtrei ASHA ba kim dei ban sangeh treikam namar ka sorkar jylla kala shim khia ban pynurlong ia ki 2 tylli ki mat jingdawa jong ki.
Lah ban kdew baka tnat ka koit ka khiah kala mynjur ban bei tyngka lada ki ASHA ki shitom bad thaw daki Polisi ban nym don shuh ka jingshah wengkam tang daka rai ki VEC lane ki Dorbar hynrei haba iadei bad ka jingdawa kyntiew bai nong, ka Myntri ka tnat ka koit ka khiah kala kular ban iakren bad u Myntri Rangbah ka jylla haka 6 tarik mynta u bnai.
Haba pynpaw ia ka jingsngewdiaw halor ka rai jong ka MAWU ban phah shong jahthait iaki ASHA haduh 6 tarik mynta u bnai, ka Myntri ka tnat ka koit ka khiah kala ong “Nga kyntu iaki nongtrei ASHA ban don ka jingshaniah haba iatreilang bad ka sorkar, ym ban iatynjuh bor daka ba sangeh trei…. ka shong haki ASHA mynta ban pynshai namar kidei ki nongiarap ia u paidbah, u paidbah khlem ki ASHA kan don ka jingdkoh haka koit ka khiah, hato phim shaniah iaka sorkar haduh ba phin ia shong jahthait haduh ka 6 tarik”.
Ka Kong Ampareen kala ong ba kum ka Myntri ka tnat ka koit ka khiah kam lah ban kular la yn lah ne em ban shim rai ban pynkiew iaka bainong jong ki ASHA haka jingialang bad u Myntri Rangbah ka ban long haka 6 tarik mynta u bnai.
Kala iathuh ba ka sorkar ka donkam sa T.40 klur man u snem ban pynbit pynbiang ia kumba 7000 ngut ki ASHA hapoh Meghalaya.
“Nai leh ia kine ki kam ki ban pyndkhoh iaka koit ka khiah jong u paidbah, shaniah iaka sorkar, kadei ka sorkar kaba phi jied hi ma phi bad kadei ruh ka sorkar ka ban khmih iaki jingdonkam jong phi. Ym donkam ia ngi ban iatyngkhuh para ba iatreilang” kala ong.
Pule lang ia kane: Pynthikna u DyCM ban pynkut noh ka Tnad Pulit ia ki kam dawa pisa jubor ha Jylla
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
