Shillong, Risaw 13 : Ka Nongialam ka Congress Legislature Party (CLP) ba shah sospon Kong Ampareen Lyngdoh hynne ka sngi palei kala kyntu ia ka All India Trinamool Congress (AITC) ban husiar bha haba kdew kti ia kiwei.
Haba iakren bad ki nongthoh khubor, I Kong Amparren ila ong ba ka jingmih jong ka AITC bad kumno ka mih ka Jylla ka dei kaei kaei kaba la don lypa ha ka kiba bun ki kynrum kynram.
“Ta ka daw lada phi kdew ia ki kti sha ka party ha kawei ka Jylla haba ka party jong phi ka mad ia shibun ki jingkynrum kynram ia kiwei pat ki kam, sngewbha ban da phikir bha. Da phikir bha haba phi kdew ia ki kti sha kiwei pat” ila ong.
I Kong Ampareen ila kynthoh iakane halor ka jingkynthah ba man ka sngi jong ka AITC ia ka Sorkar MDA ba ialam da ka NPP.
Haba pynpaw ba ki jingkynnoh ki dei kiba lah ban pynkih naka por sha ka por da ka liang Pyrshah, I kong Ampareen ila ong “Ta ka daw nga ong ba kam pher ha nga mano ba ong ia kaei. La nga leh ma nga ne ngam leh kam don jingmut satia hynrei ngan iai bteng ban leh ia ki kam kiba bha, ngan iai bteng ban jam shakhmat bad ngam ai jingkhein ia ki nongkynthoh namar kam don jingmut naba kan nang kham sniew ha ki bnai ban wan”.
Ine I MLA ba shah sospon jong ka Congress ila ong ba ka buit leh politics jong ka AITC kan nym treikam satia ha Jylla Meghalaya.
