Shillong, Naiwieng 27 : Ka Khasi Jaintia Christian Leaders Forum (KJCLF) hynne ka sngi U Blei kala kyntu ia ki Dkhot jong ka imlang sahlang bad ki Sengbhalang ba kin long jai jai noh ha kaban ioh noh ia ka lynti ban pynbeit ia ki jingeh baroh, ia kiba ym lah satia ban ioh lyngba ki kam thombor bad jingleh riewkhlaw.
Ha ka kyrwoh, ka KJCLF ka pynpaw ba ka ruh ka sngewsih lem bad ki bahaiing hasem jong ki briew kiba iap na ka jingjia ha Mukroh bad ka jingbitar jong ki briew bad ki kynhun kiba la leh ia ki kam thombor ha kylleng ki jaka ha kine ki khyndiat sngi bala leit noh.
Kane kala mih hadien ba ka Jylla kala sakhi ia ka jingmih ki jingiakhih hadien ka jingshah siat iap ki 5 ngut ki Khasi ha ki Pulit ka Assam ha Mukroh, West Jaintia Hills, kaba jia myn ha ka 22 tarik Naiwieng.
Kala ong ba ka jingbitar ia kane ka jingjia ka dei kaba lam sha ki jingiakhih jong ki kynhun bapher bapher.
“Ka KJCLF ka kyntu ia baroh ki briew bad ki kynhun ha Jylla ba kin long jai jai noh bad ban kiar na ki kam thombor khnang ban lah pynbeit ia kane ka kam” ong ka Forum.
“Ki jingjia ba mih kila ktah ia ka kamai ka kajuh jong ki briew bad khamtam ia ki samla pule kiba dang pule bad ialeh eksam. Kito ki runar kiba pynthohbria ia ka nam jong ka jingiakhih ban ioh iaka bishar ba hok ki dei ban ioh iaka jingpynsajia” kala bynrap.
Ka KJCLF kala kyntu ruh ia ka Sorkar Jylla ban pyni ia ka jingtbit treikam bad ban don ka jingsngew haba buddien ia ka sienjam ban wanrah pat kham kloi ia ka jingsuk.
