Nongstoin, K’lyngkot 20 : Ka Joint Action Committee ki lai tylli ki Polling Station (Misei, Langdongdai, Mawsmai) hynne ka sngi Nyngkong, kila dawa ia u Deputy Commissioner ka West Khasi Hills ban pynjlain shuwa ia ka jingpynrung kyrteng thymmai ha ka Electoral Roll jong ki 21 tylli ki Shnong ka thain.
Ka JAC hapoh ka jingialam u Chairman Bah Jeremiia Dkhar, kila leit iakynduh markhmat ia u Deputy Commissioner bad aiti da ka dorkhas halor kane ka kam.
Kane ka jingkyntu kala mih namar ka jingmynjur ba dang shen jong ka KHADC ban pynneh biang ia ki 21 tylli ki Shnong na ki lai tylli ki Polling Station (Misei, Langdongdai, Mawsmai) sha Mawshynrut constituency, kaba larai ha ka Dorbar Kyrpang jong ka Council ba long myn ha ka 19 tarik Nohprah, 2024 lyngba ka Constitution of District Council (Amendment) Rules, 2024.
Ka JAC kala pynpaw ba kane ka Bill ka dang don mynta hapoh ka District Council Affairs (DCA) ka Sorkar Jylla ban bishar hashuwa ban phah sha u Lat ka Jylla ba un ai ia ka jingmynjur.
Ka JAC kala kyntu ruh ia une u Khliehduh ka District ba un phah ia kane ka dorkhas sha ka Tnad DCA ka Sorkar Jylla ba kan leh ia kaba donkam.
Haba kren sha ki lad pathai khubor, u Bah Jeremiia ula kyrpad ia u Symbud Myntri Rangbah ba khmih ia ka Tnad DCA Bah Prestone Tynsong ba un tuklar ha kaban pynkloi ban phah ia ka Bill sha u Lat ka Jylla ba un ain oh ia ka jingmynjur.
