Shillong, Jymmang 04 : Ka HID Foundation kala kyntu ia u Deputy Commissioner ka Ri-Bhoi District, ba un ai ka jingiada ba kyrpang ia ki khynnah da kaba pyntreikam pyrrkhing ia ki Ain bad ban pynshai paidbah halor ka hok jong ki khynnah hapoh ka District.
Ka Foundation lyngba ka Nongpoh Unit, kala aiti ia ka dorkhas sha u Deputy Commissioner bad Chairman ka District Child Welfare & Protection Committee (DCWPC) ka Ri-Bhoi ha ka 4 tarik Jymmang haba pynpaw ia ka jingsngewsih kaba khraw halor ka jingkiew ki kam runar pyrshah ia ki khynnah hapoh ka District.
Kane ka jingkyntu kala mih ruh hadien ka jingjia kaba sngewsih, kaba la jia ia I Khunlung ba dang shu kha, iba shah tep im dang shen ha ka thain Mawhati.
Ki Jingkyrpad Kiba Kongsan ha ka Dorkhas:
1. Ka Jingpyntreikam ia Ka Aiñ: Pynthikna ban pyntreikam tyngeh ia ka JJ Act, 2015 ryngkat bad ki kyndon halor ka jingai noh ha ka rukom kaba shngaiñ katkum ka Section 35; POCSO Act, 2012; Prohibition of Child Marriage Act, 2006; bad ki kyndon jong ka BNS, 2023 halor ka jingiehnok bad ka jingbym sumar ia ki khynnah.
2. Ka Jingïalang Jong Ka DCWPC: Khot ia ka jingïalang kaba kyrkieh jong ka District Child Welfare & Protection Committee (DCWPC) ban bishar biang ia ka jingtreikam jong ka DCPU, CWC, SJPU, bad ki Village Level Child Protection Committee, bad ban pynkhlaiñ ia ka jingiatreilang hapdeng ki tnat sorkar bapher bapher.
3. Ka Jingpyrta Paidbah & Jingpynshai: Ai hukum ban pynlong ia ka jingpynshai paidbah ha baroh kawei ka district halor ka jingai noh ia ki khynnah ha ka rukom kaba shngaiñ, ki jingkitkhlieh katkum ka aiñ halor ka jingiehnok, bad ban ai jinghikai ia ki ASHA, ki nongtrei Anganwadi, bad ki nongpyniaid shnong. Pynthikna ia ka jingsumar bad ka jingpynbeit pynbiang ia i khyllung ba la ïoh pyllait lyngba ka DCPU.
4. Ka Jingkitkhlieh: Pan ia ki Action-Taken Report na ki tnat treikam bapher halor ki jingduna ha ka jingiada ia ki khynnah bad buh ia ka jingpeit bniah manla ka por ia ki jingpynkheiñ ia ka hok ki khynnah.
U Executive Coordinator ka Foundation Bah Sonilad Malai ula ong ba ka Hid Foundation ka sngew ba ka jingshngaiñ jong ki khynnah ka dei ka jingkitkhlieh lang jong baroh khamtam ki kmie ki kpa bad kiba ha ing ha sem ruh.
Ula kyntu jur ia u Deputy Commissioner ba un pyrshang ban pynlong ia ka Ri-Bhoi kum ka district kaba long nuksa ha ka jingiada ia ki khynnah.
Ka Foundation ka pynpaw ruh ban ai ia ka jingiatreilang pura bad ka bor District ha kino kino ki kam kiba bha na bynta ka district.
