Shillong, Risaw 08: Ka Neelam Misra (First Lady) kaba dei ka kurim jong u Lat ka jylla Meghalaya u Brig. (Dr) BD Mishra haka 7 tarik u Risaw kala iakynduh bad iakren bad ki heh ophisar jongka tnad Textile and Handicrafts, ki nongseng kam lajong bad ki Self Help Groups ha Raj Bhavan, Shillong.
Ka Neelam kala kyntu ia ki ophisar ba kidei ban ai mynsiem bad ban ai jingiarap ia ki nongthaiñ jaiñ tynrai khamtam ia ki longkmie ban pynthikna ba kin lah ban pynneh pynsah iaka riti ka dustur tynrai ka jong ki bad ha kajuh ka por ban kyntiew iaka imlang sahlang.
Kala dap daka jingsngewtynnad iaka jingshimkhia ki ophisar sorkar ha kaban kyntiew ia kam thaiñ jaiñ tynrai bad kala kyntu ia baroh ban ialeh ban shimkhia ban pyniaid ïew ia kitei ki mar ha kylleng ka pyrthei bad kane ka sienjam kan pynthikna ban kyntiew iaka ioh ka kot jong ki longkmie.
Ha katei ka jingialang la iadonlang u Principal Secretary ka tnad Textile u Sampath Kumar, u Commissioner & Secretary tnad Textile Bah F.R. Kharkongor, Director NIFT, Shillong Dr. A. Das, ka Deputy Commissioner jongka East Khasi Hills, ka Kong Isawanda Laloo, u Secretary ka tnad Textiles Bah T. Lyngwa.
Nalor kane, la iadonlang ka Kari Lombi kaba dei ka OSD jongka sorkar Arunachal Pradesh bad ka Ratan Anya, ka Chairperson jong ka Oju Welfare Association of Arunachal Pradesh kiba lawan ban iaphylliew jingmut bad ki nongsengkam lajong jongka jylla Meghalaya.
Ha kane ka sngi la pyni ruh iaka Documentary halor ka kam thaiñ Jaiñ haka jylla Meghalaya bad Arunachal Pradesh ia kaba la ai jingiaroh da baroh.
