Shillong, Jymmang 08: Ka seng Congress kaba don ha ka Liang Pyrshah hynne ka sngi Palei, kala pynpaw ba ka sorkar kadei ban pynsted noh ha kaban shna ia ki jingker sainar ha ki thain khappud jong ka ri India bad Bangladesh.
“Ka Meghalaya ka hap ban pynkhlain ia ki khappud ki jongka. Ki BSF kila khmih bniah ia katei bad nga tharai ba ki shipai ki tip bha bad nga tharai ba kala don ka jingiakren ba kadei ban don ka jingker sainar ha khappud kaba dei ban pynkloi noh bad ban peit ha kata ka rukom kumba ngim don ia ki paramarjan kiba biang. Ki long ki paramarjan ki bym skhem jingmut haba ngi peit na ka liang ka kam synshar khaddar, kumta ka long kaba ma bha bad ngi donkam ban shimkhia bha ia kane” ong u Secretary ka MPCC u Bah Manuel Badwar haba iakren bad ki nongthoh khubor.
U Bah Badwar ula ong, “Ngam ioh ba kan don ka jingkylla ha jinglong jingman ha baroh ki liang, hynrei ha ka jingshisha ka Bangladesh kala sdang kylla kum ka bym ieng ha ka nongrim kumta lada phi don ia ka ri ka bym don ia ka nongrim ka bym don ia ki atiar kiba biang ha ka rukom synshar, kin ai ia ki jingkren kiba pohdor bad ngi lah iohsngew ia ka rukom kren ka jongki katto katne ki nongialam kiba pawkhmat jong ka ri Bangladesh bad kam dei satia kaba ngi dei ban khein sting namar ba kidei kiba la shah bei tyngka bad lehse ka don ia ka jingthmu kaba sha lyndet ba ki kwah ban kyntiew ia ka kyrdan ha ka ioh ka kot ia kaba kila pan ia ka jingiarap na ka ri China bad ngi kum ka jylla ngi iengskhem ba ngi dei ban ym shah ia ki kam ban ialeh pyrshah ia ka ri ba kan jia bad kam pher lada ki ai ia kano kano ka jingkren ruh hynrei ngam dei pat ban khein sting.
Ha kaba iadei bad ka jingjia hapdeng ka India-Pakistan, une u nongialam ka Congress ula ong, ba ka ri baroh kawei ka hap ban long lang kawei naduh dohnud bad mynsiem bad ka sorkar ryngkat lang bad ki shipai jong ka ri.
“Ka Project Sindoor kum ka kyrteng ka pyni ba kadei kaba la ai kyrteng hadien jong ka jingshah pyniap khamtam eh ia ki shi kurim kiba dang shu dep ia shong kurim. Ngi lah duh bun. Nga tharai baroh kawei ka ri kadei ban don ryngkat lang bad ka sorkar, ka ri bad ki paidbah bad ngi kum ka ri, ngi dang dei ban kylla long kum ka ri kaban wan ha ka kyrdan kaba lai ha kaba iadei bad ka jingioh ia ka ioh ka kot ha ka pyrthei. Ngim dei shuh kaba rit” ula ong.
“Shaei ka Pakistan? Ka Pakistan kam don hangno hangno, balei ngim lah ban ia ieng lang kawei bad ngi hap ban iakhun, ngi hap ban pyni sha ka pyrthei ba ngi ieng ha la ka nongrim. Ngim dei ban shah leh baheh. Kane ka thma kaba la sdang da ka Pakistan lyngba ka jingkyrshan kaba kala ioh na kiwei pat (Proxy War) hapoh ka khyndew jong ka ri India ym dei satia ban pdiang ha kano kano ka rukom da kano kano ka sorkar ruh ne da uno uno uba dei u nong India. Ngi baroh kidei ki nong India bad ngi dei ban ieng beit kum kawei” ula ong.
