Shillong, Jylliew 06 : Ka seng Bharatiya Janata Party (BJP) ha ka sngi Thohdieng, ka la kyntu ia ka Sorkar Jylla ba kan shim ia ki sienjam ba mardor ban pynbit pynbiang ia ka jinglong jingman jong ki hospital sorkar hadien ka jingkhlad noh dang shen ka longkmie ba dang pun khun ha Maternal and Child Health Hospital, Jowai, West Jaintia Hills District.
Ha ka kyrwoh, ka President ka BJP Mahila Morcha, kong Susuki Pariat ka la ong ba ka jingkhlad noh jong ka longkmie ba armet ha MCH Hospital ha Jowai ka la wanrah ia ka jingshai sa shisien halor ka jingduna jong ki jaka ai jingsumar ha ka jylla.
Katba kito kiba don ba em ki lah ban leit phah sumar ha ki jaka sumar kiba bha, ki briew na ki iing ba duna ka ioh ka kot ki hap ban hun ha ka jingsumar ki jaka ki bym bit bym biang. Kane ka buh ia kiba bun ki nong Meghalaya ha ka jingma kaba khraw.
“Ngi kyntu ïa ka Sorkar Jylla ba kan shim ïa ki lad ki lynti mardor ban pynbha ïa ka jinglong jingman jong ki Hospital sorkar khnang ban lait na kum kine ki jingjia ba sngewsih. Ki paidbah jong ka jylla ki dei ruh ban shim kabu ïa ka skhim Ayush jong ka Sorkar Pdeng khnang ba kin ïoh ïa ki jingsumar kiba bha tam wat ha ka dor kaba rem,” ong u Pariat.
“Ngi la iakynduh ia ka khlieh jong ka National Commission for Women, ka Delina Khongdup, bad ngi la pyntip sha ka ia kane ka jingjia. Ka la kyrpad ia ki bor ba dei peit ban jurip ia ki jaka sumar man ka por,” ka la bynrap.
