Guwahati, Naiwieng 01 :Ka sorkar Assam kala kyntu lyngba ka shithi sha ka sorkar pdeng na ka bynta ban pynngat daw sniew ne ‘Blacklist’ ia ki 10 ngut ki bar ri kiba pynkhein ia ki kyndon ain kiba iadei bad ka visa ha kane ka jylla.
Ki nong Germany bad Sweden kiba la shah pynphai pat ha une u taiew ba la dep namar ka jingpynkhein ia ki kyndon visa da kaba leit iashim bynta ha ki jingialang leh niam, kila shah kyntu ban shah ‘Blacklist’ khnang ban khanglad ia ki ba kin ioh visa ban wan biang sha India ha ki por ki snem kiban wan, kumjuh ia ka kynhun seng ka jong ki.
Ki laingut ki nong Sweden kila shah kem noh na Namrup, katba hynniew ngut ki nong Germany kila shah kem noh na Kaziranga halor ka jingpyrshang ban iashim bynta ha ki jingialang leh niam, kaba pynkhein pyrshah ia ki jingkyndon ain kiba iadei bad ka jingwan lyngba ka visa kum ki nongwan shangkai pyrthei ne tourist.
Na ka liang ka tnat ba kyrpang jong ki pulit ka Assam kila dep lypa ban pynngat ia ki ha katei ka thup dak sniew, khnang ban khanglad ia ki ba kin dang wan biang sha kane ka jylla hadien habud.
U GP Singh uba dei u Special DGP kaAssam ula ong “Ngi la thoh sha ka sorkar pdeng ha kaba iadei bad kine ki jinglong jingman, bad halor kane ka tnat pulit ba kyrpang jong ngi kala ‘blacklist’ ruh ha kaba iadei bad ka jingai visa sha kine ki briew bad ka kynhun seng khnang ba kin ym iohlad shuh ban wan rung hadien habud.
U Singh ula ong ruh; “Ka jingpynkylla niam ka dei kawei napdeng kiba bun ki jingthmu ia kiba ki lah ban wan lyngba ka visa kum ki missionary.Baroh ki jait visa, kaba kynthup ia ka missionary visa ka khang pyrshah ha kaba iadei bad kino kino ki jingpynkylla niam.Kumta kane ruh ka dei ka mat kaba ngi la shim.”
Katkum une u DG ba kyrpang la ong ba baroh ki SP kila ioh ia ka jingbthah ban tehlakam ha kaba iadei bad kino kino ki jingialang ne jingiaseng jong ki kynhun niam kiba ia don bynta lang da ki briew kiba na shabar jong ka ri.Ula ong ruh ba kino kino kiba kwah ban wan ialap niam ki dei ban ioh ia ka visa kum ki misionary. “Kalong kaba beain ba kin wan shane da ka tourst visa bad iashim bynta ha ki jingleh niam,” ong shuh shuh u DG.
Ha kaba kum kane ka juh ka jingjia, 17 ngut ki nong Bangladesh ruh kila shah kem noh ha une u bnai ba la dep halor ka jingpynkhein ia ki kyndon visa.Mynta ki pulit ki dang bishar bniah la kine ki bar ri kila pynkylla niam ne em iano iano sha kawei pat ka kynhun niam ha ka jylla, kata ha ka por ba kila don ha kane ka jylla.
