Shillong,Nailur 05: Ka Nongaiktien ka All India Congress Committee (AICC) Babeeta Sharma hynne ka sngi Nyngkong kala kyntu ia ka National People’s Party (NPP) ban mih noh na ka Sorkar National Democratic Alliance (NDA) ba ialam da ka BJP ha Delhi bad ban kiar na ka jingleh arsap.
Haba iakren bad ki nongthoh khubor, ka Sharma kala ong ba ka NPP kala pynpaw ba kam kwah satia ban iatehlok bad ka BJP ha ka elekshon ban wan namar kala sngewthuh ba ka BJP kam dei satia kaba wanrah ia ka jingiasngewtynnad hapdeng ki para briew.
Kala pynpaw ia ka jingkyndit ban iohsngew ba ki Iingmane kila shah pynjulor wat ha Jylla Meghalaya bad buh jingkylli la kane ka dei ka dei ka imlang sahlang ba ki paidbah ki kwah haduh ba ym lah shuh ban don ia ki Iingmane ne ki Temple ban duwai da ka jingsuk.
“Ka jingiasngewtynnad para niam kaba ju don ha Jylla kala shah pynsniew ha ka BJP” kynnoh ka Sharma.
Haba pynpaw ba ka niam kam dei ban rung ha ka kam sain pyrthei, kane ka Nongialam ka AICC kala ong “Shisien ba ka la rung ha ka kam sain pyrthei, kan sa pyniaid ia ka Ri bad nga sngewthuh ba kam dei satia ka kam jong ka Sorkar ban kyrsum ha ka kam niam”.
Kane ka Nongialam AICC kala ai jingmut ia ka NPP bad kiwei kiwei kiba iatreilang bad ka BJP ba kin weng noh na ka Sorkar NDA namar ki paidbah kin nym vote shuh ia ki lada ki dang iai iatreilang bad ka BJP.
Ka Sharma kala ong ba ka don ka jingsuba ia ka jingthmu jong ka NPP haba u Myntri Rangbah ka Jylla Conrad Kongkal Sangma ula ong ba hadien ka elekshon, ki lah ban iasoh bad ka BJP.
“Kane ka mut ba phi kwah ia ka vote jong ki paidbah ban jop ia ka elekshon bad ban pynngeit ia ki ba phim iadonlang bad ka BJP hynrei hadien ba phi jop ia ka jingshaniah u paidbah, phi la leit pyniasoh pat bad ka BJP” kala ong.
“Ka dei ka kamram jong nga kum ka Liang Pyrshah ba don jingkitkhlieh ban kdew ia kane, Mynta ka shong ha ki paidbah ban sngewthuh ba kumno ki katto katne ki riew sain pyrthei…ngam shym kdew ia baroh ki nongsain pyrthei lane ki political party, hynrei kiba pyndonkam ia ki paidbah tang ban myntoi shimet” kala bynrap.
