Shillong, Lber 31: The Achik Holistic Awakening Movement (AHAM) hynne ka sngi kala kyntu iaki nongialam na Rilum Khasi bad Jaintia ba kidei ban burom iaka hukum ka Meghalaya High Court haba iadei bad ka Roster System.
Haba kdew iaka hukum ka High Court bala pynmih haka 5 tarik Iaiong 2022, u president ka AHAM u Geogrprince Momin ula ong ba ka ïing kashari kala pynmih iaka hukum ba ym lah ban thungkam thymmai ne kyntiew kyrdan khlem da pyntreikam shwa iaka Roster System.
U Geogrprince ula kdew ba ka hukum kala kdew ba kino kino ki jingthungkam ha baroh ki tnat sorkar kidei ban iaid katkum ka Roster System jong ka bhah thungkam lane ka Reservation Policy bad la bthah ruh ba ka jingthungkam bad ka rukom bhah kam kan dei ban long beit kat kum ka Policy.
“Katkum ka hukum jong ka High Court la kdew ba namar ka jingbym don ka Roster System ka bhah thungkam ha Meghalaya ruh kam iaid bha bad bun kiba dei hok ban ioh kam kila shah pynduh noh iaka hok bad ka jingbym don ka Roster System kala pyndkoh iaka Reservation Policy bad kane kala wanrah ruh iaka jingleh shilliang haka por thungkam” la ong u Geogrprince.
U Geogrprince ula ong ruh ba ka sorkar jylla lyngba ka Office Memorandum kala pynmih iaka hukum haka 10 tarik Jymmang 2022 ban pyntreikam iaka Reservation Roster.
“Haka Para-6 jong ka Office Memorandum dated.10.05.2022 la kdew ba baroh ki rukom thungkam kin iaid katkum ka Roster System bad la kdew ruh ba ka rukom thungkam kan iaid lyngba ki Backlog naka bynta baroh ki jaitbynriew Khasi, Jaintia, Garo, kiwei ki STs & SC” ula ong.
Ula ong ba para-7 jong ka Office Memorandum ka kdew ba ka Reservation Roster kadei naka bynta ban pynthikna ba ka Reservation Policy ba kan iaid beit iaid ryntih.
Shuh shuh ula bynrap ba naka liang u Advocate General ka sorkar Meghalaya ula phah iaka jingmynjur sha ka Division Bench ba ym lah ban pyntreikam iaka bhah thungkam lane ka Reservation Policy khlem da don ka Roster System bad ula pyni nuksa ruh daka Constitution Bench Judgment reported at(1995) 2 SCC 745 (R.K Sabharwal Vs. State of Punjab).
“Ngi kwah pynpaw ba ka rai jong ka hukum jong ka Meghalaya High Court ka long kaba biang tam daka ba bthah iaka sorkar jylla ban pynbiang iaka Roster System naka bynta ban pynthikna ba ka bhah thungkam lane ka Reservation Policy ha Meghalaya ka iaid beit iaid ryntih” ula ong.
