Guwahati, Iaiong 1: Haduh jan kumba 3,000 tylli ki skul ha Assam ki la treikam tang lyngba iwei i nonghikai ha kawei kawei ka skul katba kumba 12,731 tylli kiwei pat ki skul ha Assam ki la mad ia ka jingduna nonghikai ha kaba ka jylla kam shym la lah satia ban pynbiang ha kaba iadei bad ka jingdon hapdeng ki khynnah bad ki nonghikai katkum ka jingdawa jong ka RTE Act.
Nalor kata la ioh jingtip ruh ba kiba bun bah ki skul kim don satia ia ki umbam umdih kiba biang nalor ki jingeh kiba iadei bad ki iingskul.
Haba jubab ia ka jingkylli na u MLA ka Sivasagar u Akhil Gogoi, na ka liang u Myntri ka tnat pule puthi ka jylla u Ranoj Pegu ha ka sngi Palei ba la lah u la ong, “Ia mynta hi ia ki 2,979 tylli ki skul lower primary ha Assam la pyniaid tang da u/kawei ka nonghikai, kata na ka bynta kawei kawei ka skul.Katkum ki kyndon ka Right to Education Act, 2009 ia ka jingdon hapdeng ki khynnah bad ki nonghikai ym shym la lah ban pyntreikam ha ki 12,731 tylli ki skul ha baroh kawei ka jylla.”
Hadien ka jubab na u Myntri la ioh jingtip ruh ba ki don shibun bah ki skul hapoh Assam ki bym pat don ia ki iingskul kiba biang, kaba kynthup halor ka jingpynioh ia ka umbam umdih kaba biang.
“Haduh kumba 1,616 tylli ki skul kim don ia ki jaka pynioh umbam kiba biang, katba 1,140 tylli ki skul ki donkam ia ki iingskul kiba dei da ka dewbilat.Baroh haduh 511 tylli ki skul ha ka jylla kim pat don satia ia ka bording ilektrik,” pyntip shuh shuh u Pegu.
Lyngba ka skhim Vidyanjali ka sorkar jylla, ki khynnah pule barim bad ki riew don mynsiem ki la noh synniang haduh 71,356 tylli ki pangkha (fan) sha ki skul.Wat hadien kane ki skul hapoh Assam ki dang donkam sa kumba 48,649 tylli ki pangkha.
