Shillong, Naitung 18: Ka Achik Conscious Holistically Integrated Krima (ACHIK) hynne ka sngi Ba-ar, kala kyntu iaka Khun Hynniewtrep National Awakening Movement (KHNAM) ba kan kyrshan iaka jingdawa pynkylla nongbah tlang lane Winter Capital iaka Tura.
Haba jubab iaka jingkren u Working President ka KHNAM u bah Thomas Passah ka ACHIK ka ong “Ngi kyntu baka Party jong phi ba ieng naka bynta ka bha ka miat bad ka jingsngew riewlum, phi dei ruh ban kyrshan iaka jingdawa ka ACHIK namar kane kan wanrah shuh shuh iaka jingiajan kaba skhem hapdeng ki Khasi Garo bad Jaintia”.
Ka ACHIK ka pynpaw ba ki jaidbynriew Garo kim lah ban sngewthuh balei u bah Thomas um lah ban kyrshan iaka jingdawa pynkylla nongbah tlang iaka Tura.
“Namar u bah Thomas u tip ba tang ka jylla Himachal Pradesh kaba don 2 tylli ki nongbah, kynmaw ba kiwei ki jylla ba don bun tylli ki nongbah ki kynthup ka jylla Jammu and Kashmir, Andhra Pradesh, Karnataka bad Uttar Pradesh bad haba iadei bad ka jylla Uttar Pradesh ka nongbah Prayagraj kadei ka Judicial Capital bad ka Lucknow kadei ka Administrative Capital” la ong ka ACHIK.
Ka ACHIK ka pynpaw ba kane ka jingdawa pynkylla nongbah tlang lane Winter Capital iaka Tura ka long kaba shong nongrim khamtam haba iadei bad ka jingtheh iaki kam pynroi bad kane ka jingdawa kadei naduh 1972 bad mynta kala iaid palat 51 snem.
“U bah Thomas u kam baka thain Garo Hills kala ioh shibun ki kam pynroi ha kine ki khyndait snem. Ngi kyntu ia u ba un wan sha Garo Hills ban iohi iaka jingshisha namar ka iapher bak la bak bad ka Shillong. Haba iadei bad ka mang tyngka 2022–2023 ka sorkar ka mang T.700 haduh T.1000 klur naka bynta ka Shillong Smart City hynrei tang T.50 klur la mang naka bynta ka Tura Smart City. Watla kata ruh ka ACHIK kam ju pynpaw ia ka jingpyrshah hynrei daka ba shong ha Shillong, phi kam baka thain Garo Hills kala ioh shi bun ki jingmyntoi ka long ka bym lah ban pdiang” la ong ka kyrwoh.
Ka kyrwoh naka ACHIK ka kdew ruh ba ki jingtei kam pynroi naduh ka MATI, Meghalaya Legislative Assembly, NEIAH, IHM, NIFT bad ka Shillong Technology Parks nalor kiwei ki kam pynroi ki don lut ha Shillong bad kane ka paw ba dei ka Shillong kaba ioh khambun ka mang tyngka naka bynta ki kam pynroi.
“Kane ka jingka baka thain Garo Hills ka iai ioh shibun ki kam pynroi ka paw shai ba u bah Thomas um shym la sngewthuh iaka kyntien ban ioh ka juh ka bhah bad dei tang lada don artylli ki nongbah ka jingioh ruh kan long mar kajuh” kala ong.
