Shillong, Iaong 01 : Ka kynhun ki nongtrei Anganwadi kila dawa ia ka Sorkar Jylla ban mynjur noh mardor ia ka jingpynkiew kyrdan ia ki nongtrei Aganwadi bala pyndep ia ka graudaute, thungkam pura noh ia ki bad ban pynkiew ia ka honorarium sha ka T.15,000 shibnai.
Ha ka shithi bala phah sha u Myntri Rangbah ka Jylla Conrad K Sangma dang shen, ki nongtrei Anganwadi kila ong ba ka Sorkar Meghalaya ka kubur ia ka jingkongsan ki nongtrei Anganwadi haba pynrtreikam ia ki skhim ba kongsan ka Sorkar kum ka Maternal & Child Health Program, Supplementary Nutrition Program bad ka Easrly Childhood Education. Hynrei ha Meghalaya, ki nongtrei Anganwadi kiba la don ia ki graduate degree bad bala trei da ki phew snem, kim shym la ioh ia ka jingkyntiew kyrdan hapoh ka por ba dei, watla kila pyndep lut ia ki kyndon jingshakri ha ki kyrdan bapher bapher.
“Ngi, kumta, ngi dawa ban pyntreikam noh mardor ia ka jingkyntiew kyrdan ba sahteng iaki nongtrei Anganwadi bala pyndep graduate kat kum ka memo ba 2 tarik Jylliew 2023” kila ong.
Haba pynpaw ba bun na ki nongtrei Anganwadi ha Meghalaya ki dang iai bteng ban trei da ka jingsiew honorarium, watla ki pyntrei ia ki skhim bala pynwandur bha jong ka Sorkar kiba batai ia ki kyndon treikam,ka shithi ka ong ba ka Contract Labour (Regulation and Obolition) Act, 1970, ka Industrial Dispute Act, 1947 bad kiwei kiwei ki Labour Laws ki kren ba ki nongtrei bala trei khlem sangeh da ki snem hapoh ki skhim ka Sorkar ki dei ia kaban thungkam pira noh, ban ioh ia ka kam kaba shngain, ka jingsiew kaba iahap, ki jingmyntoi haba shongthait, bad kiwei kiwei.
“Ngi kyntu ia ka Sorkar Meghalaya ban thungkam pura noh ia ki nongtrei Anganwadi kat kum ka Meghalaya Service Rules, kaba ithuh ia ka synniang ba ki ai na ka bynta ka bit ka biang ki paidbah” kala ong.
Haba kdew ruh ia ka nongrim kajuh ka jingsiew ia kajuh ka kam bala kdew ha ka Labout Laws, ka shithi ka ong ba ia mynta, ki nongtrei Anganwadi ki ioh ia ka honorarium n aka bhah ka Jylla kaba long T.3000- bhah ka Sorkar Pdeng T.4500 shibnai, ka bym pat biang satia ban pyndap ia ki jingdonkam bad ki jinglut jingsep.
Ha kiwei ki Jylla, ki nongtrei Anganwadi ki ioh ia ka honorarium kaba heh nalor kiwei kiwei ki jingmyntoi.
“Kumta, ngi dawa ban pynkiew noh ia ka honorarium sha ka T15,000 shibnai, kaba long kat kum ka National Standaed bad ki jingai jingmut ka Sorkar” kala bynrap.
