Shillong, Naiwieng 06 : U Myntri Rangbah ka Jylla Conrad K Sangma un plie paidbah ia ki jingtei thymmai bad ki kor sumar ba thymmai jong ka Tura Maternity and Child Hospital (MCH) hashuwa ka Khristmas.
Ia ka hospital la kyntiew kyrdan da ka shnat ba thymmai ba 50 jingthiah bad ka jingpynkha ia ka Neonatal Intensive Care Unit (NICU) ba nyngkong eh nalor ka jingpynkhlain ia ka Special Newbore Care Unit (SNCU).
Ia kane la pyntip ha ka jingialang bishar kam bala pyniaid da u Principal Secretary ka Tnad ka Koit ka Khiah Sampath Kumar ba long ha ka sngi Balang, ban shim jingkhein ia ka jinglong ki jingtei bad ki kor ba don mynta ha kane ka hospital lem bad ki kam ban sa leh hadien habud.
Kane ka jingkyntiew kyrdan ka dei kaba la leh da ka jingthmu ban pynjanai ia ka rukom ai jingsumar ia ki Kmie ba kha khun bad ki Khunlung ha Tura MCH.
U Kumar ula pyniaid ruh ia ka jingialang syllok la ka jong bad ki hospital shimet ka ri-lum Garo, ha kaba ki hospital kila mynjur halor ka jingkongsan ban don ka jingiatreilang ban pynduna ia ka jingiap ki Kmie ba kha khun.
Ki bor pyniaid bad ki specialist ba kynthup ia u Dr. Paul P. Francis – pediatrician, Dr. Suzie, Gynecologist, Jengjal CHC, Dr. Dilla K. Sangma, Gynecologist, Tura Christian Hospital, Sr. Claire- Gynecologist bad Dr. Michael- Pediatrician, Holy Cross Hospital kila wan iashimbynta ha ka jingialang.
La pyntip ruh ba kan pyntreikam noh ia ka Chief Minister’s Safe Motherhood Scheme (CMSMS) ban lah ai jingsumar ha ka por kaba biang bad khlem ka jingsiew pisa sha ki longkmie ba kha khun bala phah na ki hospital ka Sorkar.
 hashuwa ka Khristmas.){kind=link}