Shillong, K’lyngkot 24 : U Myntri Rangbah ka jylla u Conrad K. Sangma hynne ka sngi Thohdieng ula plie ïa ka First Referral Unit (FRU) ha Ranikor CHC, South West Khasi Hills ha ka jingdon ryngkat lang jong ka Myntri ka Koit ka khiah ka Kong Ampareen Lyngdoh.
Ïa kane ka jaka ai jingsumar kaba la dep ban shna pynbha, ka kynthup ïa ka Operation Theatre kaba treikam pura, ka Labor Room bad ki tiar katkum kane ka juk kaba mynta ban pynlong ïa ka jingwad bniah ha kaba iadei bad ki jingpang jingshitom.
Kine ki jingpynbha ka dei kaba la leh da ka jingthmu ban ai ka jingshakri kaba bha ïa ki paidbah ha ki thaiñ nongkyndong ha ka liang ka pang ka shitom.
Haba kren ha ka jingïalang, u Myntri Rangbah ula ong, “Kane ka dei ka sngi kaba sngewsarong ia ka Sorkar jylla namar ka jingjam jong ngi sa uwei u mawjam ban kyntiew ïa ka jingai jingshakri ha ka koit ka khiah ha ki thaiñ nongkyndong. Bun ki briew ki hap ban leit da 5-6 kynta na ka bynta ban ioh ïa ka jingsumar bad kane ka jingpynbha ïa ka jaka ai jingsumar kan iarap ban weng ïa katei ka jingeh bad ban iada ruh ïa ka jingim briew”.
Ula pynapw ïa ka jingsngewnguh ïa ka tnad ka koit ka khiah bad ïa ki nongai jingsumar kiba hakhamt eh.
“Nga iaroh ïa ka jingtrei shitom bad ka jingaiti jong ki doctor bad ki nurse ki jong ngi, kiba la trei khlem thait ha kitei ki jaka kiba eh. Ka jingtrei shitom ban shakri ïa u paidbah ka jylla ka long shisha kaei kaei kaba hap ban iaroh” ula ong.
Ka sorkar kala iai bteng ban shim ïa ki sienjam ban ialeh ban kyntiew ïa ki jaka ai jingsuamr ha kylleng ki jaka bad ban pynthikna ba baroh kidei ban ioh ïa ka jingsumar kaba biang ha baroh kawei ka jylla.
