New Delhi, Jylliew 04 : U Nongialam ka Indian National Congress (INC) Rahul Gandhi ula ong ba ka elekshon Lok Sabha 2024 ka dei ka elekshon ban iakhun ym tang ia kiwei ki seng sain pyrthei hynrei ka dei ka jingiakhun ban pynthikna ia ka jingshngain jong ka Riti Synshar Paidbah ka Ri.
Haba iakren bad ki nongthoh khubor hadien ba pynbna ia ka result Lok Sabha, u Rahul ulaong ba ka result kala pynshisha ba ki paidbah ka India kim don jingshaniah shuh ha ka jinglong nongialam u Narendra Modi kum u Myntri Rangbah Duh ka Ri bad u Rahul ula khein ruh ia ka result kum ka jingjop jong baroh ki nongshongshnong bad ka Riti synshar paidbah.
Une u Nongialam ka Congress uba dei ruh u Nongialam ka INDIA Bloc-ka kynhun synrop ba ialam da ka Samajwadi Party (SP) bad ka Congress, kala ioh palat 232 seat. Katba ka kynhun synrop ka NDA jong ka BJP kala ioh haduh 292 seat.
U Rahul Gandhi ula ong ba ka elekshon Lok Sabha 2024 kam dei tang ka jingiakhun ia ki bor sain hima sima jong ka BJP hynrei ka jingiakhun pyrshah ban iada ia ka Central Bureau of Investigation (CBI), ka Directorate of Enforcement (ED) kaba kat kum ka jingong u Rahul ki dei ki Ophis kiba la kynnoh pyndonkam bakla da ka Sorkar BJP.
Haba rah ia ka copy jong ka Riti Synshar ka Ri ha kti, u Rahul ula ong “Ka jingiakhun ka long ban iada ia ka Riti Synshar ka Ri….Ngi la thikna ba ki nongshongshnong ka India kin pyrshang ban iada ia ka bad nga kwah ban ai khublei ia baroh”.
Ka kynhun synrop INDIA block kala trei borbah ha kane ka elekshon bad kala knieh ia bun ki constituency ba khlain bor ka BJP khamtam ha Uttar Pradesh.
Halor ka jingjop ka Congress ha Amethi, u Rahul ula ong “Ka BJP kam shym la burom ia ki paidbah bad kim ju kren bha ia ki paidbah hynrei u Kishori Lal Sharma ula don ka jingiadei ba iajan bha bad ka Amethi lem bad ki paidbah, kumta kala shai kdar naduh ba sdang ba un jop”.
U Gandhi ula jop na Rae Bareli seat ka Uttar Pradesh da palat 4 lak ha kane ka elekshon Lok Sabha 2024. U Rahul uba ioh haduh 6,70,000 vote, ula pynliem ia u kyrtong ka BJP Dinesh Pratab Singh uba wan ba-ar bad u Thakur Prasad Yadav jong ka Bahujan Samaj Party uba wan balai.
Ka Congress kala knieh noh ruh ia ka Amethi na ka BJP da kaba pynliem ia ka Myntri ka Sorkar Pdeng ka Smriti Irani.
