Shillong Jylliew 04: U Chief Electoral Officer ka jylla u BDR Tiwari hynne ka nsgi ba-ar ula ai khublei ia baroh ki bor pyniaid elekshon halor ka jinglah ban pynlong ia ka elekshon Lok Sabha kaba iaid beit iaid ryntih ha ka jylla.
Haba iakren bad ki nongthoh khubor, u CEO ula ong, ba ka jingpynlong ia ka elekshon kala long kaba jaijai bha bad kam shym la don satia kano kano ka jingjia ban hap ban pynlong biang ia ka jingthep vote ha ka jylla.
“Nga kwah ban pynpaw ia ka jingsngewnguh ia broh kiba donbynta ha kaban pyniaid ia ka elekshon ha ka jylla baroh kawei kiba la trei khlem shongthait ban pynlong ia ka elekshin kaba jop. Nalor kane, ka rukom leh ki paidbah ha kaban kyrshan bad pynkhlain iaka jingsynshar paidbah ha ka jylla ka long kaei kaei kaba hap ban ai jingiaroh” ula ong bad ka ai khublei ia ki pulit, ki shipai ha ka jingpynthikna ban pynneh ia ka shongsuk shongshngaiñ ha ka por long elekshon.
Ula ong, ka jylla kala kynjoh sha ka 76.6 percent ha ka jingpoi jong ki nongthep vote ha ka elekshon MP ha kaba ka jingthep vote ha ka Shillong Parliamentary Constituency ka long 73.78 percent bad ha Tura Parliamentary Constituency ka long 81.37 percent bad kane ka jingpoi thep vote kadei kaba heh haba ianujor bad ki elekshon MP kiba la dep ha ka jylla.
