Agartala, Risaw 22 : Ka BJP hadien ba kala shah rem ha ki jylla bapher bapher kala shu thied ia ki MLA bad thaw ia ka sorkar ym ha ka lynti jong ka synshar paidbah, hynrei lyngba ki kam leh shukor, ong u general secretary ka CPI-M u Sitaram Yechury ha Agartala hynnin ka sngi Thohdieng.
Haba aijingkren ha ka rally kaba paidbah briew, u Yechury ula ong ba ka BJP kala thaw sorkar ha Goa, Karnataka, Madhya Pradesh, Maharashtra bad ha ki jylla ka thain shatei lammihngi (Northeast) hadien ba kala thied ia ki MLA hadien ba kila pulom ban ioh ia ka jingshaniah jong u paidbah ha ki ilekshon assembly.
“Mynta ki (BJP) don tang kawei ka atiar ban synshar ia ka ri.. kata ban wanrah ka jingsngew iapher niam bad kynhun bynriew, kata ban pynshit iwei ia iwei pat.Hadien phra snem ka jingsynshar jong ka BJP, kila don shibun ki briew hapoh ka ri India kiba la mad ia ka jingthngan jingkyrduh bad ha kiba bun kiwei pat ki bynta.Ka ri mynta kala sakhi halor ka jingkyrduh kam kyrduh jam kaba shyrkhei,” ong u Yechury.
Da kaba kynnoh ia ka sorkar BJP halor ka jingmab ei ia ka ram kaba haduh T.11 lak klur lyngba ki bank na ka bynta ki hehspah ne millionaire bad ka jingpynjot ia ka ioh ka kot jong ka ri lyngba ki polisi treikam ba shukor jong ka, u Yechury ula ong ba ka BJP kala nang pynriewspah ia ki briew kiba don ba em da kaba knieh noh ia ki hok jong ki briew kiba duk ba jynjar.
Ula ong ruh ba na ka liang ka Election Commission kam shym la pynleit jingmut than ha kaba iadei bad ka jingpynbna ha kaba iadei bad ka jingpynlong ia ka ilekshon assembly ha Himachal Pradesh, hynrei ym na ka bynta ka Gujarat.Ula ong ruh ba na ka liang u PM Modi khah khah ula pynlong ka jingleit jngoh ia ka Gujarat bad plie ia ki projek barim ban shukor ia ki paidbah bad ban ioh khring ia ki vote.Un sa wan ruh sha Tripura ha ka taiew ka ban wan ban leh kumjuh ha kane ka jaka,” ong u Yechury.
Na ka liang une u nongialam ka CPI-M uba la pynpaw ruh ka jingsngew hun mynsiem ban iohi ia ka jingwan iashim bynta shitrhem jong ki paidbah ha kane ka jingialang, ula ong ba ki paidbah shen kin pynsangeh ia ki jingleh jingkam jong ka BJP kiba long pyrshah ia ki paidbah.
Kiwei pat kiba la aijingkren ha kane ka jingialang ki kynthup ia u nongialam ba la rim ka CPI-M uba dei ruh u CM barim ka Tripura u Manik Sarkar bad u Secretary ka party ha ka jylla u Jitendra Chowdhury kiba la kynthoh tyngeh ia ka sorkar BJP halor ka jingpulom ban pynurlong ia ki jingkular ilekshon bad namar ka jingbym treikam shuh ki bor jong ka ain, da kaba kyntu ruh ia ki paidbah ba kin pynkhreh na ka bynta kane ka ilekshon assembly ka ban wan ban pynrem noh ia ka BJP bad ban pynwan biang ia ka Left Front ha ka bor synshar.
