Shillong, Nohprah 14 : U National Vice President bad Symbud Myntri Rangbah Bah Prestone Tynsong hynne ka sngi Balang ula ong ba kam lah long ha kaban pyndonkam ia ka song pisa ka Sorkar kum ka song pisa ka seng sain pyrthei.
“..la ka dei ka BJP, kaba pyniaid mynta ia ki kam ka Ri India lane ki seng riewlum ha kiwei kiwei ki Jylla, phi donkam ban sngewthuh kawei ba kam lah ban long satia ban pyndonkam ia ka song pisa ka sorkar kum ka song pisa ka seng sain pyrthei” ong u Bah Prestone haba iakren bad ki nongthoh khubor.
U ong ba ki jingkynnoh jong kiba bun ki Nongialam sain pyrthei ba ka NPP kala phah ia ka song pisa na ka mang tyngka ka Jylla sah Manipur, Mizoram lane Arunachal Pradesh ka dei tang ki jingkynnoh khynnah haba bynrap “Kumba nga ong ba wat T.1 ruh hap ban ai jingkhein. Namar kata, ym ju shah satia ban pyndonkam ia ka song pisa ka Sorkar ban myntoi ki seng sain pyrthei”.
U Bah Prestone ula ong “Kumno ba ngi pyniaid ia ka party, balei ba ngan iathuh ia phi. Ngi pyniaid ia ka party dalade bad kumno ngi leh ka shong ha ka jingstad jong ngi. Kane ka long ruh ia kiwei ki seng sain pyrthei, la ka dei ha India lane ki Jylla kiba pyniaid ia ki party kumne hi”.
Halor ka jingkynnoh u President ka MPCC ma Vincent H Pala ba ki MLA ka NPP kila nang phet namar ka jingtieng ioh kim jop shuh ha ka elekshon ban wan namar ka party, u Symbud Myntri Rangbah ula ong “Ki phet ne ki briew na kiwei ki party kila wan iasoh bad ngi?”.
“Ki arngut ki MLA kila iehnohkam namar ba ki sngewthuh ba kin nym ioh ticket shuh bad dei namar kata ba kila phet” ula ong. Kat kum ka jingong jong u, tang lai ngut ki MLA ka NPP kin nym ioh ticket shuh bad arngut kila dep ban iehnohkam
Haba kylli ia ki jingkam jong ka BJP ba kin nang don bun ki MLA ka NPP ki ban sa wan pyniasoh sha ka BJP, u Bah Prestone ula ong “Ngam don jingtip ia kane. Phi kylli na ka BJP”.
