Shillong, Nohprah 14 : U Symbud Myntri Rangbah ka Jylla ba khmih ia ka Tnad PWD (Roads) Bah Prestone Tynsong hynne ka sngi Balang ula pyntip ba ula dep bthah ia u Contractor ban maramot noh mardor ia ka surok Jowai bypass namar ba kala jot rathai.
“Ngi la dep ai ia ka work order bad ngi la dep bthah ia u contractor ban sdang noh mardor ia ka jingmaramot ia kane ka surok” ong u Bah Prestone haba iakren bad ki nongthoh khubor.
Ula pyntip ba ia ka work order la dep ai hadien ka jingmynjur jong ka National Highway Authority of India (NHAI), Regional Office, Guwahati bad bynrap “Shen kan sa sdang noh ka jingpyntrei”.
Ha ka sngi ba-ar, ka NHAI kala pyntip ha ka Iingkashari Meghalaya Hih Court ba kam long satia kaba shai mano ba hap ban leh ia ka jingmaramot ia ka surok Jowai bypass la ka dei ka NHAI lane ka tnad PWD (Roads) ka Jylla.
Haba kylli halor kane ka jingbym thikna, u Bah Prestone ula ong “Ia mynta hi, ka Jowai bypass ka dei kabab la peit da ka Tnad PWD ka Jylla hynrei ia ka pisa baroh bala mang, ka dei kaba wan na ka Ministry of Road Transport”.
Ka Iingkashari kala pan ruh ia ka kaiphod halor ka jinglong jingman jong ka surok Jowai Bypass. Ha kajuh ka por, u Bah Prestone u pyntip ba ka jingmaramot ia ka surok National Highway na Mawryngkneng sha Puriang ka dang iaid shakhmat. Ula pyntip ruh ba ka jingmaramot ia ki surok ha ki jaka sor ruh kila sdang shaid shaid mynta.
