Agartala, Nohprah 01:U Symbud Myntri Rangbah (Dy.CM) ka Tripura u Jishnu Dev Varma hynnin ka sngi Balang ula kynthoh pyrshah ia ka CPI-M halor ka jingpynmih ia ka jingiakynad da ka jingiarap jong kynhun runar hashwa ka jingpynlong ia ka ilekshon hapoh Charilam Assembly Constituency ka jong u hapoh Sepahijala district.
Kane ka jingpynpaw jong u Varma kala wan long ruh hadien ka jingiaumsnam kaba la jia hapdeng ki nongtrei ka CPI-M bad ka BJP ha Charilam Assembly Constituency ha kaba haduh palat 15 ngut ki nongtrei ka CPI-M kila ngat ha ki jingmynsaw katba uwei pat ula khlad noh hadien ba la pynkit shapoh ka hospital.
“Katba ka ilekshon kala nang jan ki nongialam ka CPI-M kila wanlam da ki kynhun runar na Bishalgarh kaba hapoh Sepahijala district na ka bynta ban pynthut ia ka jinglong jingman hapoh Charilam Assembly Constituency.Lada ki pyndonkam da ki kynhun runar ban pynthut ia ka shongsuk shongsan ha ka constituency ka jong nga, kumta ruh ki nongtrei ki jong ngi kin khanglad ia ki.Ym tang mynta hynrei la bun bun sngi ki nongkyrshan ka CPI-M kila leh ia kiba kum kine ki kam pyntriem.Uwei u myntri sorkar barim ka CPI-M ula wan rung ha Charilam ha ryngkat ki kynhun runar ia kaba ula ju leh teng ruh ha ki por kiba la dep.Hynrei, hadien ba la thaw ia ka BJP kumta ruh kine ki kam pyntriem kila kham duna,” ong shuh shuh u Dev Varma.
Nalor kata ula ong ruh, “Ngin ym lah ban shah ia kiba kum kine ki jingleh jong ki katto katne kiba la wan ialam da ki kynhun runar hapoh Charilam.Kane ka jaka ka dei kaba suk ba sain bad ka CPI-M kala pyrshang ban pynthut ia ka shongsuk shongsain bad namar jong ki kane ka jingjia baroh kala wan jia.”
Lah ban kdew ba haduh palat 15 ngut ki nongtrei ka CPI-M kaba kynthup ia u myntri sorkar barim uba dei ruh u MLA ka CPI-M u Bhanu Lal Saha kila ngat ha ki jingmynsaw hadien ba ki nongkyrshan jong ka BJP la kynnoh ba kila thombor naphang ia ki.
Uwei na ki nongtrei jong ka CPI-M ia uba la tip kyrteng kum u Saheed Mia ula khlad noh namar ka jingmynsaw kaba jur hadien katei ka jingshah thombor ha ki nongkyrshan jong ka BJP.
Haba kren sha ki lad pathai khubor, u MLA Saha ula ong ba ka CPI-M kala ioh ia ka jingbit na ka bynta ban pynlong ia ka jingialang hapoh kawei ka jaka surok ba kyndon hakhmat ka ophis ka party jong ki ha Charilam kaba hap hapoh Sepahijala district hadien ba ki kynhun runar ka BJP kila wan ban thombor naphang.
