Agartala, Naiwieng 17 :Da kaba kynthoh pyrshah ia ka Trinamool Congress, u Myntri Rangbah (CM) barim ka Tripura u Biplab Kumar Deb ha ka sngi ba Ar ba la lah ula khot ia kane ka party kum “ki sim kiba wan buhai shnong shipor napoh Siberia.’
Haba aijingkren ha ka jingialang paidbah ha Thalcherra ha Amarpur sub-division ka Gomati district ka Tripura, u Biplab uba dei ruh u MP na ka Rajya Seat ba tang marwei na ka jylla ula kynthoh pyrshah ia ka Trinamool Congress da kaba ong; “Kane ka party ka long kum kito ki sim kiba wan buhai shnong shipor napoh Siberia, namar haba ka por kala dei kine kila wan bad ki mih noh na ka jylla hadien ba la kut ka samoi.”
Haba kyntu ia ki paidbah ba kin ai ka jingkyrshan ia ka seng BJP ha kane ka ilekshon 2023 ka ban wan, u Deb ula ong; “Ngim dei ban ialeh pyrshah para mangi. Ha u 2018 ngi la vote na ka bynta ka jinglaitluid bad ha u 2023 sa shisien pat ngin vote ia ka BJP na ka bynta ban tei ia ka lawei ba phyrnai na ka bynta ki khun ki kti ki jong ngi bad na ka bynta ka ioh kam ioh jam ka jong ki.Lada u Myntri Rangbahduh (PM) Narendra Modi u don hapoh ka sorkar pdeng, kumta baroh kiei kiei kin sa wan urlong.Shano ka Congress bad ka CPIM mynta? Baroh kila jah rngai bad kim don shuh.Haba kim lah ban iada iala ka jong ka lawei kumno kin lah na ka bynta kiwei? Ka CPIM kam don lynti.”
“Ki don ruh ki katto katne ki party ia kiba la tip kum ki party kiba wan tang ha ki samoi.Haba ka por kala dei kin wan bad hadien biang kin mih noh na ka jylla haba ka samoi kala kut noh.Ki long kum kito ki sim kiba wan buhai shnong na Siberia,” ong shuh shuh u Deb.
Da kaba kynthoh tyngeh ia ka CPIM, une u MP ula ong; “Haba nga leit ban jurip sha ki thain nongkyndong ha ki snem 2015, 2016, ki nongshong shnong kiba dei na ka kynhun bynriew Janajati kila dawa ban pynioh ia ki ia ka jinglaitluid na ka jingsynsahr donbor jong ka CPIM. Ban iada ia ka jingim jong ki bad ia kawei ki wanrah ia ka BJP ha ka bor.Na ka laing ka CPIM kila thaw ia ka Ganamukti Parishad bad pyndonkam ia kine ki jaidbynriew Janjati kum ki vote bank ha ki kam sain hima sima jong ka.Kaei kasba ka CPIM kala leh na ka bynta ka bha ka miat jong ki Janajatis? Kine ki jaidbynriew kila ioh ia ka burom tang hadien ba ka BJP kala thaw ia ka sorkar ha u snem 2018 hapoh ka jingialam jong u PM Modi.”
Shuh shuh u Deb ula kam ruh da kaba ong hadien ba ka BJP kala thaw ia ka sorkar ha Tripura, kane ka party kala shim ia shibun ki rai kiba iadei na ka bynta ka bha ka miat jong ki jaidbynriew Janajati kiba shong ba sah ha kane ka jylla.
