Shillong Nailar 01: U MLA ka South Shillong Constituency Bah Sanbor Shullai hynne ka sngi Palei, ula ong ba u MLA uba jaituh bad uba shu shong ha jingthiah ruh u ioh ia ka MLA Scheme kaba T.250 lak hynrei donkam pat ban trei shitom nalade ban pynioh ia kiwei pat ki skhim na ka bynta ka bha ka miat bad ka roi ka par jong ka Constituency.
Katei ka jingkren u Bah Sanbor kadei halor ka jingong ba ki MLA kiba don ha ka Liang Pyrshah kim lah ban trei ne ban wanrah bun ki skhim sorkar.
U Bah Sanbor ula ong ba ka jingkam jong ki katto katne ki MLA kam long ka jingshisha namar ka shong beit ha ka jingtrei shitom u MLA ban wanrah bun ki lad ban ioh ia ki scheme.
“Nga la trei shitom hi dalade ban wad ia ki skhim na ka sorkar jylla bad sorkar pdeng bad nga la pyniadei bad baroh ki nongtrei sorkar naduh kiba bat ia ki kyrdan kiba rit haduh kiba bat ia ki kyrdan kiba heh khnang ba ki kam ki jam kin iaid sted na ka bynta ban wanrah ia ki skhim bapher ha ka constituency” ula ong.
U Bah Sanbor ula tyrwa ruh ban iarap ia kiwei pat ki MLA ban ai jingtip kumno ba kin ioh ia ki scheme, nalor ka MLA scheme kaba la mang lypa bad ula ong ba ka ïing jong u ka plie na ka bynta kiwei ki MLA bad wer ia ki ban ki wan sha ïing jong u ban iasyllok, wat ban ialam ia ki sha Delhi ban leit wad ia ki skhim bapher bapher na ka sorkar pdeng.
Ha kane ka sngi u Bah Sanbor Shullai ula lum ia kaj ingialang ha State Convention Centre ia kabala wan ban iashimbynta da ki heh ophisar sorkar na ki tnad bapher bapher, ki nongialam shnong bad ki kynhun bapher bapher ban iasyllok ha kaba iadei bad ka jingpyntreikam ia ki skhim bapher bapher ha ka South Shillong Constituency.
Haba iakren bad ki nongthoh khubor u Bah Sanbor Shullai ula pynshai ruh halor ka jingshah kynnoh ba ym shim la pyni eiei iaka jingpynlut ia ka MLA Skhim kaba T.2.50 Lak hynrei ula batai tang shaphang ka T.10 Lak jong ka Discreationary Grant. U Bah Sanbor Shullai ula ong, ia ka MLA skhim ka Special Urban Work Programme (SUWP) jong u snem 2023-24 ula dep pyllait naduh u Kyllalyngkot 2024 bad pynbna ruh ba nalor ka T.250 lak, sa 8 lak man la uwei u MLA u ioh kaba kynthup iaka scheme ISYDP T.3 lak, ka DTFM T.2.5 lak bad ka IA&CDP T.2.5 lak. Ula iathuh ba ha ki 3 snem ba la dep nalor ka MLA scheme kaba ula ai ia ki paidbah, kum u MLA ula pynioh sa 107 klur, 46 lak, 16 hajar, 8 spah 43 tyngka, na ka sorkar jylla bad sorkar pdeng ban theh ia ki kam pynroi hapoh ka Constituency.
