Shillong, Rymphang 23: Ka All India Trinamool Congress (AITC) kam donkam ban pynshai sha u Rahul Gandhi halor ka jingieng ka AITC ban iakhun pyrshah iaka Bharatiya Janata Party (BJP) la ka dei ha Meghalaya ne ha kiwei ki jylla ka ri India.
Ia kane la ong da ka Member of Parliament (MP) sha Lok Sabha na ka seng AITC ka Mahua Moitra kaba la pynrem jur ruh ia u nongialam ka All India Congress Committee (AICC) u Rahul Gandhi uba la kynnoh ba ka AITC ka wan ha Meghalaya tang naka bynta ban pynkhlain iaka BJP.
Haba kren sha ki lad pathai khubor ka Mahua kala kam ba ka TMC kam dei ka Team B jong ka BJP ne jong kino kino ki Party namar mynta ka kynti haba peit iaka sain hima hapoh ka ri India, dei tang ka seng TMC kaba nud ban ieng pyrshah iaka BJP.
Ka Mahua kala kam ba ki sngi ban synshar tang da ki National Party ha ka ri India ka la kut bad lada hap ban ap khmih tang ha ka “Bi-Party” System kamut ka synshar khadar paidbah kan nym don shuh hapoh ka ri India.
“Ka seng TMC ha West Bengal ha man ki ilekshon ka iakhun pyrshah iaka BJP bad haduh mynta ka TMC kala lah ban thaw sorkar haduh 3 sien kynthih haka jingialam daka Mamata Banerjee kum ka myntri rangbah ka jylla bad dei namar kane ka TMC kam donkam ban pynshisha sha u Rahul Gandhi ne ïano ïano ruh baka TMC ka pyrshah BJP” la ong ka Mahua.
Ka Mahua kala ong ba ka ba kongsan iaki paidbah ka Meghalaya kidei ban sngewthuh ba ka TMC kadei ka National Party bad ka wan ha Meghalaya ban iarap iaka jylla ban ioh ka sorkar kaba treikam naka bynta ka bha ka miat u paidbah bad iaki nuksa ki paidbah ki lah ban sakhi kumno ka TMC ka pyniaid iaka sorkar hapoh ka jylla West Bengal.
Nalor kane ka Mahua Moitra kala ther ruh ia u myntri ka tnat kam pohïng u Amit Shah halor ka jingkam ba ka Meghalaya kadei ka jylla ba bamsap tam hapoh ka ri India da ka ba ong ba u Amit Shah nalor ba udei u myntri sorkar pdeng udei ruh u nongialam ba rangbah ka BJP, kaba don lang hapoh ka sorkar synroplang ka Meghalaya Democratic Alliance (MDA).
“Lada ka BJP ka don lang kumba 5 snem bad ka sorkar MDA, ka paw shai ba ka BJP ruh ka iohi iaki kam bamsap ha kane ka jylla, te ka jingkylli ka mih mynta, balei u Amit Shah u sngap jar 4 snem tam hynrei mynta ba la jan ielkshon u la sdang ban kyndit bynriew” la ong ka Mahua.
