Shillong Nailur 08: Ka President jong ka BJP State Mahila Morcha ka Kong Susuki Pariat hynne ka sngi Thohdieng kala kynthoh ba ka jingkynnoh u MLA barim ka Mawsynram u Bah Himalaya M Shangpliang pyrshah ia u President ka BJP-Meghalaya Bah Ernest Mawrie ka long kaba bakla bad kadei kaba don jingthmu eiei sha lyndet.
“Kadei ka jingthmu kaba u Bah Shangpliang ula don lypa sha lyndet ban pynjah burom ia u President ka BJP Meghalaya Bah Ernest Mawrie tang ban ioh pynshongnia iaka jingphet seng ka jong u da kaba kynnoh bad kynthoh kylla ia kiwei pat. Ula kynnoh kylla ia kiwei ha kapor ba ula mih noh na ki ar tylli ki seng saiñ pyrthei tang ha u snem ba la dep na ka bynta ka jingmyntoi ha kam saiñ pyrthei bad ka jingwad ka bym kut ia ki jaka phlang ba jyrngam” ong ka Kong Pariat ha ka kyrwoh khubor.
Kala ong ba u President ka BJP Meghalaya ula jied ia ka ban long kum ka President jong ka BJP State Mahila Morcha katba iaka State Mahila Morcha Executive Committee pat la jied da ma ka da kaba iasyllok bad ki nongkitkam, kumba la pynkup bor da ka riti synshar jong ka seng, ha ka 3 tarik u Naitung 2023 bad u Bah Ernest Mawrie ym shim la jied ia ki nongkitkam kumba la kynnoh da u Bah Shangpliang.
Ka Kong Pariat kala pynshai ba la jied ia ki 3 ngut ki General Secretary jong ka Mahila Morcha ka long katkum ki kyndon treikam.
Ka Dakaniwan Shullai kala shah jied kum ka General Secretary kaba hakhmat eh bad la pynkhamti ia ka kam ban pynbiang bad pynkhreh ia ki kaiphod, katba ka Kong Matilda Kharbuki bad Kong Grace Lanong kila shah bynshet ia ka kam ban ai jingkyrshan ia ka Kong Shullai.
Ka Kong Pariat kala kynthoh kylla ia u Bah Shangpliang halor ka jingkynnoh bad u Bah Mawrie ula thung ia ka kurim ka jongu kum ka General Secretary jongka Mahila Morcha.
“Ka Kong Matilda Kharbuki, General Secretary ka Mahila Morcha kadei kawei na ki dkhot kaba la rim tam haka seng BJP naduh ba kala rung ha ka seng ha ka por ba u Bah Khlur Singh Lyngdoh ula long u President bad kala bat ruh ia ki kam kum ka Vice President, General Secretary bad Treasurer jongka State Mahila Morcha hapoh ka jingialam jong u President barim ka seng u Bah Shibun Lyngdoh” ong ka Kong Pariat.
Kala buh jingkylli, da kaba ong, “Kumno ka jingshah thung ka nongialam kaba la rangbah ka Kong Matilda Kharbuki, kaba dei ka nongkitkam jongka BJP ha ka jylla kaba bat ia ki kyrdan kiba kongsan ha ka samoi treikam jong ki 3 ngut ki State President kadei kaba la jied bahaiing kumba la kynnoh da u Bah Shangpliang?”
“Kine ki jingkynnoh ki bym don nongrim bad kiba dei tang ka khwan myntoi, ki long kiei kiei ki bym itynnad bad ki bym iahap na ka liang jong u Bah Shangpliang. Ka State Mahila Morcha Executive Committee baroh kawei ka phla ba kim shym la shah thung ha u State President Bah Ernest Mawrie kumba la kynnoh da u Bah Shangpliang uba don ia ka jingthmu kaba sha lyndet,” ong ka Kong Pariat.
Nalor kane, ka State Mahila Morcha Executive Committee kala banjur ba ym shim la don kino kino ki dkhot jongka BJP State Mahila Morcha kiba la shah jied da ka jingsngew bahaiing ha u Bah Ernest Mawrie ne ka Kong Susuki Pariat.
“Ka BJP kam dei na ka bynta ki kam politik kiba tad dor, hynrei ka ieng naka bynta ban kyntiew ka roi ka par bad ia ka jylla bad ban wanrah iaka shongsuk bad ka bha ka miat jongki paidbah” la ong ka Kong Pariat.
