Shillong Jylliew 26: U Nongialam ka Liang Pyrshah ha Khasi Hills Autonomous District Council (KHADC) u Bah Titosstar Well Chyne ula kynthoh, ba ka jingbym iashimbyta u MP ka VPP ha ka elekshon ban jied ia u Speaker ka Lok Sabha ka long ka bym shongnia namar uba shong ha ka shuki Speaker udei u briew u bym shah liang (Neutral)
U Bah TW Chyne ula kynthoh ia kane halor ka jingpynbna ba u MP ka VPP u Dr Ricky AJ Syngkon yn ym iashimbynta ha ka elekshon jied Speaker jongka Lok Sabha kaba long hynne ka sngi Balang.
“Kane ka rai ka pynsha-iïong ia ngi ki paidbah nongjied ba balei u MP jong ngi u shim ia kane ka lynti. Nga iohi ia ki jingpynpaw ha ki Social Media ba ka jingbym iashimbynta ka long kumba kyrshan ia ka Liang Synshar. Hynrei ia kata, ngi ieh beit ha u paidbah ba un bishar, hynrei na nga hi, nga sngew ba katei ka rai kadei ka bym sngew shongnia namar haba la jied kum u MP dei ban trei bad dei ban pyni la ka long ha kano kano ka dur” ong u Bah Titos.
“U Speaker katkum ka riti synshar lada ka dei ha Parliament, ne iingdorbar thawaiñ ka jylla ne u Chairman ha ka District Council, ngi pyni ba u Speaker u long u bym don liang. Haba ngi jied ia u briew u bym don liang kumta udei ban don ia ka jingiadei bad baroh ki MP kiba la jied hangto. Lada u MP u jong ngi namar ba ka don ka elekshon ym treh ban iashimbynta shuh, ka mut u pyni ba um vote ia ka Liang Synshar ne Liang Pyrshah” ong u Nongialam ka UDP.
U Bah Titos ula ong “Ha kano ka rukom une u Speaker yn khein ia u MP jong ngi bad kaei ka jingsngew jong u Speaker, shu buh lada u Speaker u don ia ka jingsngew ba un ym da khein ia u MP jong ngi namar ba u khlem Vote ne iashimbynta ha ka elekshon Speaker, kumta nga don ia ka jingsngew ioh ka ktah namar kum u MP u donkam shibun ki paralok bad u hap ban mih ban rung sha u Speaker. Ki don ruh ki Committee bapher bapher ha Lok Sabha lehse lada u Speaker u sngewthuh ia ka jingdonkam ia u (Ricky) ban buh ha ki Committee lehse kum u dkhot ka Parliamentary Committee un lah ban noh synniang shibun ha kaba iadei bad ki aiñ ki kanun bad ha kaba iadei bad kino kino ki kam hapoh ka Parliament”.
“Haba ngi lah ioh ia u MP, ki paidbah ki khmih lynti ia kaei ka kam kaba u MP un leh hapoh Parliament, ha ka iingdorbar ka ju don ar liang, ka Liang Synshar bad ka Liang Pyrshah, hynrei nga iohi mynta lyngba ki Social Media ba bun kila ai iaki jingpynsngew halor ka jingleh jong u Dr Syngkon, ba ym don ha ka Liang Synshar ne Liang Pyrshah hynrei la rai ban shong marwei, to ia kata kadei ka rai kaba stad ka jong u kaba ngim don eiei. Kaei kaba ngi sngewkhia bad sahnud kum ki paidbah bad kaei ka jingmyntoi kaba ki paidbah kin ioh na kata ka jingleh ka jong u, lada kadei ba kan ai jingmyntoi kan bha shibun” ong u Bah Titos.
