Shillong, Jylliew 26: Ka Meghalaya ka don haka jingiakhun kaba jwat ban rat dyngkhong ia u drok bad iaka jingngop ki samla kaba buh ia ka lawei jong ki ha ka jingma kumba la jia hapoh ka Jylla Punjab.
Haba kren haka sngi rakhe iaka sngi pyrshah drok lane ka “International Day against drug abuse and illicit trafficking” u Myntri ka tnat Social Welfare u Bah Paul Lyngdoh ula ong baka long kaba donkam eh ban iasnohkti lang baroh ban rat dyngkhong ia u drok lem kumta ka lah ban pynlong iaka Meghalaya kum ka Jylla Punjab.
U Bah Paul ula kubur ba ki don ka por baka Jylla Punjab ka pawnam bha haki kam ialehkai bad kam iada Ri hynrei mynta kane ka Jylla kala shah pynjot ha u drok bad pynjot iaka lawei ki khun samla.
Ula kyntu iaki samla ka Jylla Meghalaya ban peit nuksa na kaei kaba la jia hapoh ka Jylla Punjab bad donkam ban shim iaki sienjam ba tyngeh ban iada iaka jingshah pynjot ka Jylla ha u drok,
U Myntri ula kubur ruh baka Meghalaya kam dei shuh tang ka Jylla kaba pyniaid lynti ia u drok sha kiwei pat ki Jylla ka thain shathei lammihngi hynrei u drok ula rung lut sha man ki kyndong kynshrot jong ka Jylla.
Ula iai ban baka long kaba donkam ban iatreilang hapoh ka imalng sahlang ban iakhun pyrshah iaka jingkyrni drok.
“Ka imlang sahlang hapoh ka Jylla Meghalaya kala sngewthuh ba donkam ban pynsted bad pynkhlain iaki sienjam haba iadei bad ka jingtehlakam iaka jingwanpoi bad ka jingkyrni u drok hapoh ka Jylla namar mynta ka imlang sahlang kala sngewthuh ba ngi hap ban jop ne ngi hap ban kylla ki nongjot hakhmat u drok” la ong u Bah Paul.
U Bah Paul ula ong baka por kala kut ban ia kdew kti markylliang, watla ki lah ban don ki jingduna hapoh ki Policy jong ka Sorkar ne haki rukom treikam ka social welfare hynrei baroh ki lah ban ai jingmut haba iadei bad ka jingiakhun ban rat dkhong ia u drok.
