Nongpoh, Nailar 13 : Uwei u samla 27 snem, ula kynthih nalor ka jingkieng Wah Umtrew ha Byrnihat bad ngam jyllop ban phet na ka kti jong ka kynhun ki runar dih droks, kiba la kthong ia u namar ka pisa.
Une u samla u kyrteng u Wanphrangsngi Syiemlieh ba na ka shnong Nongkyndang Saiden. Kane ka jingjia kala jia ha ka janmiet sngi Ba-ar ha ka por 5 baje eiei.
Kat kum ka jingiathuh ki Pulit, u samla Wanphrangsngi u dei shiparalok bad kine ki nongdih drok bad ka jingjia kala mih tang na ka daw ka jingiapher jingmut ha ka jingiasam ia ka pisa ba ioh na ka jingiadie ia ka mobile tuh.
Ki iathuh ba hynnin ka janmiet, kine ki samla kila die ia kawei ka mobile ba ki tuh bad hadien ba dep die, kila iasam para ma ki ia ka pisa ba ki ioh hynrei ha kane ka jingiasam, u samla Wanphrangsngi ula ioh tam T.300, kaba dei ka daw ba mih ka huri hura hapdeng jong ki.
Kine ki samla kila poi sha ka huri hura kaba jur bad kila khtong ia u samla Wanphrang uba iohtam ia ka pisa hynrei namar ka jingtieng, une u samla ula kynthih shapoh ka Wah Umtreh kaba ju tip ka Wah Byrnihat.
La iathuh ba kine ki runar haba iohi ba u kynthih sha u, kila lun da u maw ia u Wanphrang hashuwa ba un jah syndon ha kane ka wah.
Kat kum ka jingbatai ki bahaiing, ki don ki briew kiba phone ia ki ban batai ia kaei kaba jia bad mar mar hi, kila pyntip noh sha ki Pulit ka Byrnihat Ourpost ban ioh ia ka jingiarap.
Ki Pulit ka Byrnihat Outpost ha ryngkat ki nongngam um ka Search & Rescue Team ka tnad Fire & Emergency Services na Nongpoh bad na Shillong, hynne ka step kila hiar sha kane ka wah ban iawad ia une u samla hynrei kat haduh ba thoh ia ka khubor, namar ka jingneh jong u slap bad ka jingheh jong ka um ha Wah Byrnihat, kane ka kynhun kam pat lap satia ia ka met.
