Shillong, Rymphang 04 : U National Vice President ka NPP bad Symbud Myntri Rangbah ka Jylla Bah Prestone Tynsong, hynne ka sngi saitjain, ula ong ba kam long kaba iahap ia u Nongialam ka Liang Pyrshah Dr Mukul Sangma ban mih iakhun na artylli ki constituency ha kane ka elekshon MLA ban long la 27 tarik Rymphang.
Kat kum ka jingong jong u, ka riti synshar ka ri kam shah ia u MLA ban shakri ia lai ne lai tylli ki constituency.
U Dr Mukul uba dei u MLA ka AITC na Songsak, ula rai ban iakhun mynta ka kynti na Songsak bad na Tikrikilla.
“Ka jingsngew jong nga shimet ka long ba u (Dr Mukul) ula leh ia kane ha ka samoi bala lah. Lada u dang bteng ban leh ia kajuh ka kam, nga thikna ba ki paidbah na baroh artylli ki constituency kin nym don jingshaniah shuh ha u” ong u Bah Prestone haba iakren bad ki nongthoh khubor.
“Namar phi phi iohi ba lada phi lah ban shakri ia artylli ki constituency bad lada ka riti synshar ka ri ka shah, wat ma nga ruh ngan iakhun na ar ne lai tylli hynrei lada ngi iakhun na baroh artylli ki constituency bad ngi hap ieh noh ia kawei, nga sngew ba kam long kaba iahap. Ta ka daw ka nongrim bad ka jingsngew jong nga ka long ba ngam mynjur lane pdiang ban iakhun na ar ne lai tylli ki constituency ha kajuh ka por” ula bynrap.
Ha ka elekshon MLA 2018, u Dr Mukul ula jop na baroh artylli ki constituency-ka Ampati bad ka Songsak. Hadien ula ieh noh ia ka Ampati ban plie lynti ia ka Khun Miani D Shira, kaba dei mynta ka MLA jong ka Ampati.
