Shillong, Rymphang 04: U Kyrtong ka NPP na Mawkynrew Constituency u Bah Kansing Lyngshing bad u Kyrtong ka NPP na Mawsynram u Bah Alvin Sawkmie kila pynpaw ba ki don ia ka jingkyrmen kaba skhem ba kin jop don burom ha kane ka elekshon MLA namar ba ki ioh iaka jingieid bad ka jingkyrshan kaba radbah na ki paidbah.
Kine ki kyrtong kila pyndep ia ka jingthep kyrteng kum ki kyrtong ban iakhun ha ka elekshon MLA-2023 ka ban long ha ka 27 tarik Rymphang.
U Bah Alvin Sawkmie ula ong “Nga buh hakhmat eh iaka Civil Sub Division kaba ki paidbah ka Mawsynram kila angnud da ki phew tylli ki snem bad nga kyrmen lada ngi poi sha ka thong ngin lah ban pynurlong ia kane ka jingangnud jong u paidbah”.
Kumjuh ruh u Bah Kansing ula ong “Nga don ia ka jingangnud ban kyntiew iaka roi ka san jong ki nongshong shnong ha ka constituency baroh kawei bad ngan wanrah iaka Government College, ka Wholeseller Centre, ban kyntiew ia ki kam jngohkai pyrthei kaban long kalad kaba ki paidbah kin iohkam iohjam naka jingwankai ki nongjngohkai”.
Kine ki ar ngut ki kyrtong kila kyrpad ia ki samla, ki longkmie ki longkpa ba kin ai lem ka jingkyrshan kaba radbah ia ki ba kin lah ban jop iaka elekshon khnang ba kin ioh ban trei shitom ha ka ban kyntiew bad ban wanrah iaka jingkylla ha ka Constituency bad ban ialeh ban pynurlong iaki jingangnud jong u paidbah kiba la sahteng la bun phew snem.
