Shillong, Risaw 22: U Myntri ka Sorkar Pdeng uba khmih iaka tnad Aiñ, u Kiren Rijiju ula pyn paw ia ka jingbym mynjur bad ka rukom treikam jong ka Judiciary hapoh ka Ri haba pynpaw ruh ia ka jingbym mynjur ba kane ka jingkren ka jong u kan pynmih iaki jingkynthoh pynban kan wanrah ia ka jingiaroh.
“Kam shim la pynmih iaka jingkynthoh hynrei bun kila pynpaw ba ka long kaba biang bha namar nga la kren ia kaei kaei kaba la don lypa. Kam dei shuh kaba thymmai bad kum u Myntri ka tnad Aiñ nga hap ban pynthikna ba ka jingai iaka jingbishar kaba hok ha ka ri ka jong ngi ka dei ban long kaba khlain bha. Haba ngi pynslem ha kaban ai iaka jingbishar kaba hok ia ki riewpaidbah kumta kala pynrem lypa iaka jingthmu ka jong ngi” ong u Rijiju.
Hashwa kane u Myntri Sorkar ula ong ba ki nongbishar ki pynlut shiteng iaka por ka jongki ban shim iaka rai iano ban thung kum u nongbishar ha ka jaka ba kin ai iaka jingbishar kaba hok bad kynnoh ruh ba ka rukom jied ka kynhun ki nongbishar kam long kaba khuid ba suba.
U Rijiju ula ong ruh, ba ula batai shaphang ka rukom treikam jong ka Judiciary, Executive bad Legislature bad kidei ban shim iaka jingkitkhlieh ban trei naka bynta ka ri.
“Ia ka kamram jongki la batai bniah bad ngim donkam ban leit ha ki jaka jong kiwei pat ban pynmih ia kano kano ka jingpynphiah ia ki kyndon aiñ. Kila dei ban pynleit jingmut bad phai khmat bad ban iai neh hapoh u pud u sam jong ka jingkitkhlieh kumba la kdew shai da ka riti synshar jong ka ri” la ong u Myntri ka tnad Aiñ.
Katba bun ki dang sah haka jinglyngngoh ba ki briew kiba leh be-ijot iaka Bilkis Bano kila lait noh na phatok, u Kiren Rijiju ula ong ba ym kwah satia ban kren eiei halor katei ka mat.
Ula ong ba u lah ban mynjur ia katei ka rai ne ban ym mynjur ruh hynrei ym lah pat ban buh jing kylli pyrshah ia katei ka rai kaba la shim.
“Nga kham thrang ba dei ban pynsted ha kaban ai iaka jingbishar kaba hok, kum u Myntri ka tnad Aiñ nga don hangne ym ban kren eiei shaphang katei ka rai hynrei ban kren shaphang ki sienjam treikam bad ki kyndon aiñ” ong u Rijiju.
