Shillong, Iaiong 24 : U Symbud Myntri Rangbah ba khmih ia ka Tnad Urban Affairs Bah Sniawbhalang Dhar, ha ka sngi Palei ula kyntait wat ia ka jingkynnoh ba ka don ka jingpyndonkam bakla ia ka pisa ha ka jingpyntrei thymmai ia ka Iew Municipal ha Laitumkhrah.
Kane kala mih hadien ba u nongwad RTI dang shen ula mudui sha u Lat ka Jylla CH Vijayashankar bad Myntri Rangbah ka Jylla Conrad K Sangma ba dawa ban phah tohkit ha ka Central Bureau of Investigation (CBI) ia ka jingkynnoh pyndonkam bakla ia ka pisa ha ka jingpyntrei ia ka Iew Laitumkhrah.
“Lada don kiba pan ia ka RTI kin hap ban jubab sha u. Lada u shem ia ki jingleh bakla, u lah ban shim ia kiwei ki sienjam, kam don jingeh ia kata hynrei ka jingshisha hi ka long ba kam don satia ka jingpyndonkam bakla ia ka pisa” ong u Bah Sniawbha haba iakren bad ki nongthoh khubor.
Kat kum ka jingong jong u, kane ka project ka dang don hapdeng ka jingpyntrei bad ka jingkylli kam mih satia ba kan don ka jingpyndonkam bakla ia ka pisa.
Halor ka jingkynnoh ba kiew ka dork a mur jong ka project, u Bah Sniawbha ula ong ba um pat ioh pdiang satia ia kano kano ka jingujor da ka jingthoh halor kane ka bynrap.
U Nongwad RTI Napoleon S Mawphniang ula kynnoh ba don ka jingpyndonkam bakla ia ka posa, ka jingpynkhein ia ki kyndon treikam bad ka jingbym iaid kat kum ki kyndon iada mariang haba pyntrei ia ka project.
Ula kynnoh ruh ia ka jingdon ka bamsap bad jingpyniaid bakla kaba lam sha ka jingkiew haduh 36.8% ka dor jong ka project bad ruh ka jingpynslem ia palat saw snem.
Ula dawa ban leit thew leit woh ia ka jingshngain ki jingtei jong ka project da ka Committee ki stad ki jhad bad ban phah pynphai pat ia ka jingsiew tam bala siew sha ki contractor.
Une u nongwad RTI ula ong ba kat kum ki kot ki sla RTI la pynpaw ba u nongshim contract u dei u M/s Collinstar Sawkmie, uba dei u Kpa jong u Myntri ka Tnad Sports & Youth Affairs Bah Shakliar Warjri.
Haba kren halor ki jingleh bym hok ha ka jingai contract, ula ong ba ia kane ka project ka ai nyngkong ha u Iaiong 2020 ha ka jingmang pisa ba T.25.73 klur hynrei la pynkiew ia ka sha ka T.35.21 klur lyngba ki jingpynthymmai bad jingiapynbeit.
“Watla ia ka kam contract la ai naduh u Iaiong 2020, ia ka jaka pat la aiti sha u contractor tad haduh u Nailar 2021, ka jingpynslem ba 17 bnai. Ka project, kaba la buh ban pyndep ha ki snem bala leit, ka dang sahteng kat haduh u Iaiong 2025.
