Lah pynkhreh bha ia ki bor pahara ban niew vote
Shillong, Jymmang 29: U Deputy Commissioner ka East Khasi Hills SC Sadhu ha ka sngi Balang ula pyntip ba ki bor distrist kila pynkhreh bha ia ki bor pahara na ka bynta ka sngi niew vote jong ka elekshon Lok Sabha, ka ban long ha ka 4 tarik Jylliew.
U Sadhu uba la pynlong ia ka jingjurip ia ki jaka niew vote bad ki strong room ha madan Polo, kum shibynta ban pynkheh ia ka sngi niew vote jong ka Shillong Parliamentary constituency, ula ba ki bor District kim don jingthmu satia ban weng ia ka kynhun 144 CRPC ba khang ban iaid procession ne rally ha ka sngi niew vote..
Haba iakren bad ki nongthoh khubor, u DC ula ong “Ka jingjurip mynta ka sngi ka long na ka bynta ban batai ia ki BLO bad kiwei ki kynhun kum ka Media Team, Police, CRPF, kiba pahara ia ka strong room bad ki jaka niew vote halor ki jingpynkhreh bapher bapher ba ngi la pynbeit”.
“Ngi la pynkhreh bha nadong hadong ba kynthup ia ka jingniew vote ba iaid beit iaid ryntih haba iadei bad ki kot EVM bad ki Postal Ballot na ka bynta ki 7 tylli ki District ki ban sa niew hangne. Nalor kata, kiwei pat ki jingpynkhreh khnang ba kan nym mih kano kano ka kynrum kynram ha ki jaka niew vote bad ban pynthikna ba tang ki briew kiba la ioh jingbit, yn shah ban rung shapoh ki jaka niew vote” ula ong.
U DC ula pyntip ruh ba ula buh ia ka media cell kaba kyrpang na ka bynta kane ka sngi.
“Ngi la batai ia ka kynhun ki nonglum khubor ban pynthikna ba ki nonglum khubor kin ioh kloi ia ki jing tp khnang ba ki jingai jingtip kin iai bteng khlem thut bad kaba long haba shit haba shai. Ngin sab uh ia ka screen ia ki nonglum khubor bad ngin sa shah ia ki nonglum khubor ba kin rah ia ki mobile khnang ba kin ai ban ai khubor nangne. Kan don ruh ka jaka pynieng kali la ka jong ia ki seng sain pyrthei bad ki kynthei jong ki, ki Ophisar bad ki kynhun niew vote” ula ong.
Ha kawei ka liang, u DC ula pyntip ba un nym weng satia ia ka hukum ba khang pyrshah ban iaid procession bad rally ha ka sngi niew vote.
“Ngin ym weng ia kane ka hukum. Kam don satia ka jingpyrkhat ban weng ia ka hukum hynrei sa shisien nga kwah ban ban jur ba kam don jingkhang ia ki seng sain pyrthei ne ki kyrtong ba kin leh kmen hala ki jong ki shnong ki thaw, ngim pyrshah ia ka jinglehkmen jong ki” ula ong.
U Sadhu ula pyntip ba ula ioh pdiang ia ki jingkyrpad na ki seng sain pyrthei bad sengbhalang haba iadei bad ka jingweng noh ia ka kynhun 144 CrPC khamtam haba iadei bad ka jingkhang ban iaid rally hynrei ia kane ka hukum la pynmih da ka jingthmu ban pynthikna ba ka suk ka sain kan ym shah pynthut bad ruh ban nym pynthut ia ka iaid ka ieng jong ki nongleit nongwan.
“Namar ka 4 tarik Jylliew kaba dei ka sngi niew vote, ka dei ruh ka sngi longtrei bad ka jaka niew vote ka dei hapdeng jong ka sor kumta ka procession bad rally ka lah ban lam sha ka jingpynthut ia ka suk ka sain bad wanrah ia ka jingdheng kali kumba ngi la mad ia ka elekshon MLA” ula ong.
